La jan dep sngap paidbah, ban shna jaka rung jaka mih

Shillong, 18 Jylliew:
Ka jingthmu ka sorkar jylla ban shna ia ka jaka rung bad jaka mih ba tehlakam ia ki briew ba wan sha kane ka jylla, ka lah ban dang shim por namar ba haduh mynta, ka jingpynlong ia ka jingsngap paidbah ban shim jaka na ka bynta kane ka jingthmu ka dang sah sa ha ki katto katne ki jaka, watla bun kiba la dep lut.
Na ki 17 tylli ki jaka kiba ka sorkar ka thmu ban shim jaka ban pynlong ia ka khyrdop jaka rung jaka mih, ki dang sah sa 2 tylli ha Garo Hills.
U Officer on Special Duty (OSD) ka Meghalaya Institute of Governance (MIG) kaba pynlong ia ka jingsngap paidbah ka Social Impact Assessment (SIA) na ka bynta kane, u Bah Aibanshngain Swer u la ong ba ar tylli ki jaka ha Garo Hills ki dang hap ban wad da kiwei namar ba ki paidbah kim pdiang namar ba ka jaka kam long kaba biang namar ba ka jngai palat na ka jaka ba don ka surok.
Katba kiwei kiba don khamtam kiba don ha Khasi bad Jaintia ki la biang bad kaba sah mynta kin pynkhreh ban phah ia ka kaiphod sha ka sorkar jylla ba kan leh ia kaba donkam.”Ngi la dei phah ia ka kaiphod sha ka sorkar ia ka jingpynsngap paidbah bad ka shong sa ha ka sorkar ba kan leh ia kaba donkam”, la ong u Bah Swer.
Katkum ka jingiathuh u Bah Swer, kiba mat ba kongsan ka jingpynlong ia ka jingsngap paidbah ki kynthup ia ka jingjurip ne surbe hadien kane, kan don sa ka jingiakren ka jingpynsngewthuh ia ka jingmut ia ki paidbah bad ki nongshong kiba lah ban shah ktah na ka jingshim jaka. Hadien kane, kan don ka jingpynkreh ia ka kaiphod bad kaba khadduh ka jingpynlong ia ka jingsngap paidbah shwa ban shim ia ka rai ba khadduh.
Na ka jingiakren bad u Bah Swer, ki paidbah ha ki 15 tylli ki jaka, ba la pynlong ia ka jingsngap paidbah, ki pdiang sngewbha ia kane ka jingthmu ka sorkar.
Ki jaka ba thmu ban shna ia ka jaka rung-jaka mih ha West Jaintia ki long ha Khanduli bad ha Saphai. Ha East Jaintia Hills kin shna ha Malidor, Mooriap, Umkyrpong bad ha Laskein. Ha West Garo Hills ki long ha Singimari, Tangaon, Bangalkatta, Phulbari Ghat, Abhirampara bad ha Medhipara katba ha South West Garo Hills ki long Mirjumla, Junjoni. Ha Ri-Bhoi ki long ha 19th Mile bad ha 12th Mile bad kawei ha West Khasi Hills ka Athiabari Integrated Facilitation Centre- Entry and Exit Point.