Nongpoh: Ki riew paidbah na ar-tylli ki shnong kiba kynthup ia ka Nongmawlong bad Mawlong Thymmai, ki shnong kiba hap ha Umsning C&RD Block, ki la pynpaw ba ki la jynjar palat, namar ba ki la hap ban shongdum khlem bording mynta la jan 1 bnai eiei, kata hadien ba u Transformer uba la pyndonkam da kitei ki ar-tylli kitei ki shnong, u la duh ha u bnai ba la dep bad kat haduh mynta, ki briew na ka tnat MeECL, kim pat leit ban bujli thymmai noh da uwei pat u Transformer.
Ki riew paidbah na kitei ki shnong, ki la pynpaw ba ka jingduh u Transformer, ka la pynlong ia ki briew ha kitei ki shnong ba kin shong khlem bording bad kaba la pynsohsat shikatdei eh ia ki paidbah ha kitei ki shnong.
Haba pyrshang ban kylli na ki riew paidbah na kitei ki shnong, la ki ju siew thikna ne em ia ka bai bording Ilektrik, ha kaba ki la iathuh ba ki ju siew thikna beit ia ka bai bording, lait noh tang ki katto katne iing bad kiba la pynpaw ruh ba ia kata ka jingsiew ne bym siew bording ki briew, kam shong ha ki briew ka shnong ba kin leit tuklar ia kata, namar ka dei ka kamram jong ki briew na ka tnat sam bording ba kin leh ia kaba donkam.
Haba iadei bad katei ka jingduh bording bad kaba ki briew ki la hap ban shongdum, ki briew na kitei ki shnong, ki la kyrpad ia ka tnat MeECL ba kan shimkhia na ka bynta ban pynpoi Transformer noh, nalorkata ki la kyrpad ia ki Nongmihkhmat ka Umsning ba kin pynkren lem halor katei ka bynta, khnang ba ki paidbah ha kitei ki shnong kin ioh bording kham kloi.
Phi don ban ong eiei?