|
Shillong: Ka sorkar kaba dei peit ia ka tnad rep ka riang ka la pynbna ba ia u sohmarit bad u latyrpad la kynthup ha ki kyrdan ki mar rep ha ka 16 tarik u Jymmang.
 Haba ia kren bad ki nongpathai khubor u MLA ka Mawsynram u bah H.M.Shangpliang u la ong “Hadien shisnem ba nga la pynkynmaw ia u Myntri Rangbah bad ia u Myntri ka tnad ka rep ka riang bad mynta ka sngi ka dei ka sngi ka jingjop ia ki nongrep ki ba la ud la bun bun snem, Na ka tnad ka rep ka riang ki la la ai jingmynjur ba ia u soh mrit bad u latyrpad kin hap noh ha ka kyndon marrep”.
Kumjuh na ka liang u bah H.M.Shangpliang u la ia thuh ba ia u synsar ruh kin sa pynhap ha ka kyndon u Marrep”Ia u synsar la pynhap ha ka mar khlaw namar ba ki bud ia ka ain naduh 1891 naduh ka por ka Sorkar Phareng,hynrei ha kane ka kynti na ka liang u Myntri Rangbah u la kular ba kin sa shong cabinet ha ka 10 tarik u Jylliew 2019 ban pynkylla marrep noh ia u synsar”.
U MLA ka Mawsynram u la iathuh ruh ba ki nongrep kin ioh shibun ki jingmyntoi na ka jingithuh ka sorkar ia u sohmrit bad u latyrpad kum u marrep ha kaba kim donkam shuh ban siew ia ka khajna ha surok por ba kit ia kine ki mar rep, ha kano kano ka check gate ka District Council ne check gate ka tnad Forest, ki nongrep ki lah ban buh ia ka dor ba kham heh khnang ba yn kham ioh nong ia lade, ki nongrep ki lah ban ioh ia ka jingmyntoi na ka Horticulture ne ka Agriculture kat ba la mang da kane ka tnad bad ki nongrep ki lah ruh ban ioh ia ka jingiarap na ka Sorkar lada don kano kano ka jingjulor na ja liang ka mariang.
|
Phi don ban ong eiei?