La ioh kem ia u nongrahbor ia ka khynnah ba dang 13 snem kaba dei na South West Khasi Hills

Shillong: Hadien ba kawei ka khynnah kaba dang 13 snem ka rta kaba dei napoh South West Khasi Hills District ka la shah kynnoh rahbor ha uwei u briew u ba la tip kyrteng kum u Mohibul Ali u ba la don 29 snem ka rta, kaba la jia ha ka 28 tarik u bnai Nailar 2021 bad ha kaba iadei bad kane na ka liang jong ki pulit ka Nonghyllam Police Station ki lah ioh ban pdiang ia ka ejahar na u Bah Rofinus Hahshah ha ka 29 tarik u bnai Nailar 2021 ha ka por 11 baje mynstep u ba la pyntip ba ka khun pyrsa jong u ka la jahrngai na la ïing ha ka 28 tarik u bnai Nailar 2021 ha ka por 8 baje janmiet bad mar kumta hi na ka liang jong ki pulit ka South West Khasi Hills hapoh ka jingialam jong u Deputy Superintendent of Police(Crime) hadien ka jingtohkit kaba bniah bha bad ka jingthwet kaba jur bha ki la ioh ban kem noh ia utei u briew u ba la don ryngkat bad katei ka khynnah ha ka 31 tarik u bnai Nailar 2021 napoh ka shnong Maheshkhola jong ka South South Garo Hills District kaba don markhap bad ka South West Khasi Hills District.

Haba kren sha ki lad pathai khubor, u Superintendent of Police jong ka South West Khasi Hills District, u Bah BJ Laloo, u la iathuh ruh ba u Mohibul Ali u dei u nongniah kali bad u ba shong ba sah ha ka shnong Kantapara kaba hap hapoh ka Golapara District jong ka jylla Assam. Halor katei ka jingjia ki pulit ki la rejistar case hapoh ka Nonghyllam Police Station bad la pynngat ia u Mohibul Ali ha ka Section 363 jong ka Indian Penal Code bad ka jingtohkit ia utei u briew ka dang iaid shakhmat.