La ioh ka sorkar, ki jaka ban buh nongdie madan

Shillong, 12 Nohprah:
Ka sorkar jylla kala ioh ia ki jaka ha kylleng ki jaka ban buh ia ki nongshong die madan kiba shong ha ki jaka bapher bapher ka sor Shillong. Katkum ka jingiakren bad u ophisar ka sorkar jylla hynne ka sngi,u la iathuh ba ki jaka kim dei ha kajuh hynrei ki don kylleng kiba ka sorkar ka la pynkhreh ban buh ia kine ki nongdie madan.
“Ngi la ioh ia ki jaka sor kum ha Polo, Malki bad kiwei, ban buh ia ki nongdie madan”,la ong u ophisar sorkar.
U la iathuh ba ka sorkar ka la pynkhreh ban leit pyntip sha ka High Court ia kine ki jaka ba ka sorkar ka la pnbianh ban buh ia ki nongdie madan katkum ka jingbthah jongka hi bad kan shong ha ka ban leh ia kaba donkam.
“Ngi la pynkhreh ban leit pyntip sha ka High Court ia kane bad kan shong ha ka Kashari ban leh ia kaba donkam”, ula ong.
Haba kylli lada ki nongdie madan kim treh ban shong ha ki jaka ba ka pynkhreh ka sorkar, u la ong kata kan shong ha ka Kashari. “Lada ka ong buh ha ki jaka ba ki ju shong ruh, ka shong ha ka Kashari hynrei na ka liang ka sorkar ka la pynkhreh ia ki jaka”, u la ong.
U la ong ba ka jingshim rejister ia ki briew ba shong die madan kan sdang naduh lashai ka sngi ka 14 tarik haduh 19 tarik ryngkat ki kot ki sla ba donkam kum ka dur thep vote, ka ration card, BPL card bad ki dur ar tylli.
Ka Meghalaya High Court kham mynshwa, ka la pynmih ia ka hukum ban nym shah shuh ia ki briew ban shong die madan ha lynti iaid paidbah namar ba ka la pynwit ia ka iaid ka ieng bad ha kajuh ka por, ka la hukum ia ka sorkar jylla ba ka dei ban wad jaka ban buh ia ki nongdie madan.
Ha kine ki sngi ha ka jingkhynra ka bor synshar district, ka la mih ka jingiania bad ka jingpyrshah kaba jur na ki nongdie madan khamtam ha ka thain Motphran kiba la pyneh ba ki shong ha jaka ka Hima Mylliem ym ha ki jaka ka Municipal.
Ki nongdie madan ha surok Shillong Civil hospital, thain Umsohsun, Khyndai Lad, Motphran kila shah kyndang naphang lin na ka hukum ka High Court kaba pynaram ia ka iaid ka ieng jong ki paidbah bad ki kali, watla ka la ktah ia kiba im na kane ka kam.
Ki longkmie Khasi ha ka thain Motphran lei ha kine ki sngi, ki la kren kud lad ba ka bha ban shu siat iap noh ia ki lada ka sorkar kam shah shuh ban die madan.