Shillong:Hadien palat 30 tylli ki snem ka jingbym ïasuk halor u pud u sam, ka shnong Umphyrnai bad Lam lyer Nongkrem ha ka 19 tarik u Rym phang, 2022 ki la lah ban ïa pynbeit syndon ïa ka kam da kaba ïa sieh mawpud ha ki jaka ba la ïa hunlang.
La sakhi bad pynskhem ïa ka jing sieh mawpud da u Syiem Khynnah ka Hima Khyrim, Pa’iem Habapan Sing Syiem, u Lyngdoh ka Raid Nongkrem, Bah Pynïaidsuk Lyngdoh, Bah Bhalang Lyngdoh, Chairman ka Nongkrem Dorbar Pyllun, Tymmen Basan F Pyngrope.
Ki ar shnong ha ka jingïalam u Bah Lovingstone Kharkongor, Sordar ka Shnong Umphyrnai lem bad u Bah Pyndaplang Kharsahnoh, Sordar ka Shnong Lamlyer ki la lamkhmat ïa kane ka jingsieh mawpud ha ka jingïadonlang ki nongkitkam shnong na kine ki shnong.
Hadien kane ka jingsieh mawpud, la don ka jingïalang aiti ïa ka Soskular ba la pynskhem ïa u pud u sam da ka ophis u Syiem ka Hima Khyrim ïa kaba la pule shwa sa u Pa’iem Khynnah uba la ai ka jingkitbok jingkitrwiang ïa kine ki shnong ba kin ïa im suk im saiñ khlem don shuh ka jingïathut nangne shakhmat.
U Lyngdoh ka Raid Nongkrem, Bah Pynïaidsuk Lyngdoh u la ong ba kane ka sienjam kine ki ar shnong kan dei ka nuksa ïa kiwei pat ban ïa pynbeit ïa u pud u sam da ka jingïasngewthuh bad da ka jingïakren.
Ïa kane ka jingïalang la pynïaid da u Tymmen Basan F Pyngrope, uba la don ïa ka bynta kum u riewpdeng ban wanrah ïa kine ki shnong sha ka jingïasngewthuh jingmut.
Ka long ka nuksa ka ba bha tam na ka bynta ki wei ki shnong ruh, Lada para ma ngi ym lah ban ia pynbeit, kumno ngin khmih lynti ba yn lah ban ia pynbeit bad kiba nabar (Meghalaya-Assam-Bangladesh)