La ia kynduh Sonia, U bah Pynshngaiñ, mynta sa ia u Rahul

Shillong,16 Nohprah:
Tang shisngi hadien ka jinghiar Delhi u President ka MPCC u bah D.D Lapang ban ia kynduh ia ka Sonia Gandhi, myn hynnin ka sngi la hiar Delhi sa u khliehduh ka KHADC u bah Pyn shngaiñ N Syiem ban leit ia kynduh ia katei ka heh Congress. U bah Pynshngaiñ u la ioh ban ia kynduh ia ka Sonia ha ka por 6 baje janmiet mynta ka sngi ka 16 tarik u nohprah. U la ong ba ha katei ka jingiakynduh u la ong ba u la ioh ban batai bha jai ia ka Sonia ia kaei kaba jia ha kane ka jylla khamtam ka jingiapyni bor hapdeng jong u bad u Dr.Mukul Sangma, myntri rangbah. “Ka la ai ia nga ka por kaba biang ba ngan batai lut nadong shadong ia ki jingeh kiba mih” ong u bah Pynshngaiñ.
Ha katei ka jingiakynduh u la batai ruh ia ka Sonia halor ka ka mar maloi kaba dei ka dawbah kaba mih ka jingiapher jingmut hapdeng jong u bad u Dr.Mukul Sangma ha kaba u la batai ha ka ba u myntri rangbah u la shim ia ka rai khlem da don ka jingiakren hapoh ka Party. Hadien ka jingiakynduh ia ka Sonia u bah Pynshngaiñ u la ong ba un hap ban ia kynduh lashai ka sngi sa ia u Vice President ka AICC u Rahul Gandhi ban ia kren ia katei ka juh ka kam.
Ki lad khubor ki la iathuh ba hadien ba la ioh jingtip ia ka jingleit Delhi u bah Pynshngaiñ, u myntri rangbah ka jylla ruh u la khreh ban hiar Delhi ban leit ia kynduh ia ka Sonia naba u la suba ba lehse u bah Pynshngaiñ un leit pynshoi ia u. Hynrei la sngewthuh ba dei tang hadien ba u bah Pynshngaiñ un wan phai na Delhi u Dr.Mukul un sa hiar ban ia kren ia la ka jong ka bynta. La ong ba ha katei ka jingiakynduh u CEM ka KHADC ia ka Sonia ka la kren sngewkhia halor ka kam ar maloi.