LA I SHAIONG

PBS

“Ngan thied biang phi da la ioh bai bylla” ong u Rangsan bad u pan ja sa khyndiat watla u la dep bam ar pliang ruh.

“I Hep pat i la leit” ong ka Banri
“To sa leh aiu bam tang ma ngi ruh kein sa thied biang pat ynda u la wan” ong u Rangsan bad ieng ban leit thet noh.

“Lashai ka dang dap hi ban tah ja” ong ka kmie bad ka tap noh ia u khiew ja khliew jhur ba la ia kdang lut.

Ka Banrilang ka khlieng ia ki tiar, u Kynsai u pynlum ia ka iing katba u Rangsan u leit peit um shabar ban phrung pipe sha ka jaka khlieng na ka syntex heh. Hadien 2 kynta ba la dep bamja kata 10:30 mynmiet ki la ia bam lang khrui ia u soh water melon.

“Sngew um bha ka met ba bam ia une u soh” ong ka kmie.
“Te haba lah ong water melon te” ong u Rangsan uba dang peit whatapps.
“To da buh shwa ioh hap pynban kato ka mobai shibit” ong ka kmie kaba i lyngnga ia ka rukom leh jong u.
“To seh nga la sngewthuh hi” ong u Rangsan bad u iai bat hi ia ka mobai.
“Ka bha ba men khreh lypa ki jingrah lashai khun ban dup kloi mynstep” bthah ka kmie ia u Kynsai uba dang bam smum smum ia u water melon ba ki ot slais heh.
“Nga mut kumta kein. Haba leh biang por ym ju kham klet” ong u Kynsai.
“Ka dei khun” mynjur u Kpa.
“Lashai katno baje Hep phin leit?” kylli ka hynmen.
“Uto u paralok u ong la kumno kumno hapoh 9 baje” jubab u Kynsai.
“Ka biang ba phin ioh bamja shwa” ong ka kmie.
“Ngin sa pynlong jingduwai mynstep” ong u Kpa.
Ka por kam shah ba kin ia shongkai slem namar sa ban dap12 baje thik. Ki kynjat sngi ba ithiang ha ryngkat bad ka jingbeh lyer kaba malu mala ki pynpyngngad ha kata ka step. Baroh ki la iakhie lait noh tang u Rangsan (Bahduh) uba ju mlien ban thiah sngi la kumno kumno hapoh ka 8:30 la jan man ka step.
“Khie kyrsiew Thei ia u Bahduh ba ngin pynlong jingduwai shwa ba u Hep un leit” la bthah u Kpa.
U Kpa u la buh lypa ka airbag hajan ka miej heh ha kamra pdeng. Ki ap sa tang ia u Rangsan ba un dep dihsha.
“Ynda la dep wan noh shane” khot ka kmie ia u Bahduh.
“To nga la dep” u jubab bad u da wan rung syndon sha kamra.
Baroh ki la buh jingduwai na ka bynta jong u Kynsai ba un poi suk bad ba u Blei un da lynter ia u katba u dang sah shathie sha ka jaka ba u pule. Haba ki la dep duwai u Kynsai u la doh ia u Kpa, ia ka kmie, ka hynmen bad ia u para.
“Nga la leit mo” u ong bad u rah ia la ki beg kawei u kieng shadien bad kawei pat u rah ha kti.
“To sa leit suk khun” ong ka kmie hajan ka phalor bad ka peit haduh ba un da lait na kawei ka khongdong surok.
“Ba u la ju don lang katto phew sngi, sngew kynjah shisha” ong ka hynmen.