P.B.S
[ba bteng]“To ieh un wan hi dang katta ruh” ong u kpa bad u ieng ban leit shabar.
U Kpa u pule kai noh da ki kot khubor. Ka Banrilang ka sar ia ka kamra shetja, kamra shongkai bad kamra thiah. Ka kmie ka shu khoh byrngia noh da u kwai ban bam ha ka sngi kaba bud.
U Rangsan teng khat eh u lait na ka jingshah khnium ha la ka kmie. Ka kmie ka iai khnium shi iai khnium namar u kyrni eh ha la mobai. Kam ju don hi bad teng khat eh ba u buh ia ka mobai hynrei borabor la iohi ia u ear-phone ha shkor ba u sngap jingrwai. Da la ngiah ka sngap sa ka ialehkai. Ka jingshah tim ha la ka sngi ha la ka sngi ka la shu kylla myllen noh ha u.
“Dei ba u leh khun khadduh tharai” ong u kpa.
“Da khatduh da nyngkong ruh u dei u jait briew uba la shah khyrwait ha kato ka mobai” pynpaw ka kmie da ka jingsngewdom.
“Tip shuh” ong u menkpa.
“U dang shu pass class XII, bha ba un wad kam ne leit bylla noh” Sa tang shiteng snem hi mynta” ong ka kmie.
“Uba la ia heh u la sngewthuh hi. La un jied ia ka kam kaba shu shong shuki ne kaba trei bor met” ong u kpa.
“Ha ka shalyntem jong ka por, kiei kiei kin sa kylla” ong ka Banrilang.
“Hap shu pdiang beit ia ka jingroi jong ka jingstad. Da khnium ym myntoi kmie, baroh baroh kim lah lait. Wat kiba la rangbah ruh ki dang liat katno tam ia kiba kham lung ka rta” ong u menkpa ha ka sur kaba ai jingmut ia la ka menkmie.
“Yn leh shuh kumno?” ong ka kong Rep.
La jan don kumba 4 bnai duna ba ka kong Rep ka leitkai biang sha iing ka kong Santa. Kata ka dei ka sngi saitjain por12 duna shi teng sngi. Ba baroh ki dei kiba bun khana khamtam ka kong Santa. Ka rukom ki kynthei khamtam ki longkmie ba ki mat iakren ki kham bun lada ki iakynduh shongkai. Ki kham bniah ha kiei kiei ki bynta jingiakren khamtam ki kam iing bad ki jnit ki jnat ba iasnoh katkum ki khana iakren.
“Ka la ioh kam em kato ka khun kynthei jong phi?” kylli ka kong Santa.
“Hooid, ka la ioh kam” la jubab ka kong Rep.
“Kata te la shngain phi kumba ngi la iakren mynshwa” pynkynmaw ka kong Santa.
Hadien ba la shongkai kumba shi kynta duna la wanrah sha da ka khun ka kong Santa. Ba ka dei ka sngi saitjain ka ioh shuti. Kumta hapdeng ki jingiadihsha la tyllun ryngkat lang ruh ki khana.
“Phi ong ka Banrilang ka la ioh kam mo” kylli ka khun ka Santa.
“Hooid” jubab ka kong Rep bad ka kner artat ia u ruti ba la tah jam.
“ka biang ka biang” ong ka khun ka Santa.
“Phi mut ban ong kumno?” bniah ka kong Rep.
“Em, ka long kumne kein. Da ioh kam hi ka kynthei ka pher sha phi namar ban shu ap na u rangbah kam long kaba suk” pynshai ka khun ka Santa.
“Ka da pher bun hi phi. Nga ka kmie ruh nga nud ban pan lada donkam ei ei” ong ka kong Rep. [yn dang bteng]
Phi don ban ong eiei?