P.B.S
[ba bteng]“Nga i shaiong hi ngain kane ka juk mynta. Haba nga leit thied jingthied na dukan nga iohi ha rud lynti ba ki khynnah shynrang khamtam ha kti ha kti ki mobai bad ia shong ar ne lai ngut shi kynhun. Imat lah dei hi ka juk tynneng ne ka juk i lamwir” kren khia mynsiem ka kong Santa.
“Yn leh shuh kumno hap shu ia peit ngi lei kumne ha ka jakle bad ka lahnoh ka rta. Ban leh ruh ngim nang shu nang tang ban kren lait nangta ngim phohsniew shuh” ong ka kong Rep.
“Lah dei ban ia dihsha biang sa shisien phi” ong ka kong Santa haba ka iohsngew ba kita ki khynnah trei ki la wan kiew shajrong.
“Em, em lah biang phi lah dih kumto ruh” ong ka kong Rep bad ka ieng kum ban leit noh.
“To shim rah noh da une u pathaw ba wanrah ka khun na jaka trei” tyrwa ka kong Santa.
“To kein phi haba ki ai ia phi ruh” kren don akor ka kong Rep.
“To shim seh haba ki ai jin 5 tylli, ngan ai noh ia phi uwei” ong ka kong Santa bad ka phah shim plastik ban thep ia kawei na ki nongtrei.
“To ngan rah kata” ong ka kong Rep bad ka ong khublei shibun.
“To ym lei lei. Sa wan shongkai ei kumne teng teng sngewtynnad” ong ka kong Santa bad ka ieng na baranda katba ka kong Rep ka dang hiar na u mawjam ban hiar shapoh.
Katba ka kong Rep ka dang iaid lynti ban leit sha la iing, ha la poh mynsiem kam lah khlem lyngngoh ia ka jingkylla ka iing ka sem ka kong Santa. Ka kynmaw mynshuwa ka iing kaba malu mala hynrei mynta ka jingkylla nadong shadong. Ka pynngeit ha lade ba kane baroh ka dei ka jingbit jingbiang ki khun ha ka kam ka jam. Haba ka dang plie ia ka phalor phyllaw ka khun jong ka ka ong.
“Ka jingslem i mei te la palat. ngi la ap dihsha lang bad ngi la nang dih hi noh”
“Ba poi teng teng kum slem hi khamtam ma ngi ki kynthei ngi kham bun ktien lah poi khana shaei shaei. Sa ka kong Santa ruh kumto shapaid shapaid shaei kan shah leit kloi” ong ka kmie bad ka shim um ha klat ban kynruh ktien ba la bam kwai shapaid.
Lehse, kam long kaba bakla, ban ong ba ki kynthei bunsien kim ju lah ban sngap jar hynrei ia kaei kaba ki tip kim lah khlem da pur khana lem ia kiwei. Kumjuh ruh ka kong Rep (Kmie ka Banrilang) kam lah khlem da iathuh khana ha iing bad kumjuh ruh ha khmat u menkpa ia ka jingbit jingbiang jong ka kong Santa. Ka da ban ruh ba ka jingioh kam ioh jam ki khun ki dei ka daw ha l yndet. Ia kane ka iathuh ha ka por ba ki ia don lang baroh ha kamra peit Tv.
“Mano hi ban hun Mei khlem da shna iing haba ki bit ki biang. Ki ruh ki leh kumta namar ki biang kamai. Ha ki bym don lad pat, kin hap shu hun” ong ka Thei bad ka dang ot ia u soh water melon.
“Ka dei” mynjur u kpa bad u kner ka kti ban shim shi slais uba la ot.
“Ki don ruh arngut ki nongtrei” iathuh biang ka kmie.
“Ka jingbunkam bad ka jingbym ioh por kim banse ban buh nongtrei” ong u kpa.
“Ka dei kpa. Khlem ka daw mano hi ban shu bret kai ia ka pisa kata 3 ne 4 hajar bad lada arngut lei ym duna ia ka 7 ne 8 hajar. Kum ban shu ong noh da pynlang ei shisnem shisnem te wow katno shuh” ong ka kmie. [yn dang bteng]
Phi don ban ong eiei?