P.B.S
[ba bteng]“Ka jubab la kaba kumno kumno ruh kan wan na u Rangbah shnong” ong u menkpa.
“Haba ka skul ka iaid ar taiew tam kam ktah re ia ki khynnah?” pynpaw ka kmie.
“Kata ka shong ha ka sorkar kein ne kiba dei ia kato ka kam” ong u Kpa bad u shim ban kner ia u kwai na ka khun.
“To ieh kat kaba ka long” ong ka kmie
“Thei sa nang shet phi ngan leit shongkai shiphang sha iing ka kong Santa” la bthah ka kmie.
“To mei” la ong ka khun.
Ka kong Santa ka dei ka para shnong ka kmie ka Banri tangba ka sah ha kawei ka dong, kaba tang 40 iing. Ka long ka briew kaba riewspah bad ka don ruh ki nongtrei iing. Ki khun jong ka baroh 3 ngut ki la ia trei – kawei ha Bank bad 2 ngut ki shynrang ha Soil bad Forest Department. Ka iing trei kam sorkar te lah sngewthuh ka long kumno. Ki bit ki biang watla u Kpa u lah khlad kumba 3 snem tam. Watla u la iehnoh shadien ia ka hynrei ka ioh ia ka pension jong u.
“Nga dang kynmaw ia phi te, phi lah da wan noh hi” ong ka kong Santa ia ka kmie ka Banri.
“Kumno phi ia khlain ha iing?” ka kylli.
“Hooid, ngi ia khlain” la jubab ka kmie ka Banri.
“Phi ruh phi biang em?” la kylli kylliang sa ma ka.
“Ngi ia khlain” la jubab ka kong Santa.
“Shaei lut ki khun?” ka la kylli.
“Ki la ia leit trei lut” la jubab ka kong Santa
“Oh ki la ia trei lut mo” kylli ka kong Rep (Kmie ka Banri)
“Hooid, uto uwei ba khadduh dang shi snem duna mynta” la iathuh ka kong Santa.
“Peit, nga shu hap peit ksiew mynta ha iing hynrei shu sngew aram ba la don ki nongtrei” la ong ka kong Santa bad ka rah ia ka ksiew ha pneh jong ka.
“Haba kumta katno ngut phi la ioh ksiew?” la bniah ka kong Rep.
“Ia mynta te dang kine 3 ngut uwei u shynrang10 snem, ka kynthei 8 snem bad sa kawei pat dang 5 snem bad ka la kit khun biang mynta dang lai bnai” ka iathuh.
“Kata te la shongshit hi ka iing mo?” ong ka kong Rep.
“Hooid kein, haba don khun rit ha iing ha iing te ka pher hi” pynphai ktien ka kong Santa.
“Ei kongrit wanrah shangkwai hangne” la bthah ka kong Santa ia ka nongtrei iing.
Kumta la iaid ki minit bad ki kynta. Hadien ba la bam ar kyntien kwai, ki la ia dih sa ka sha. Ki jingiakhana ruh ki iaid ryngkat ryngkat. La don ki jingkylli pyrthew kylliang kylliang. Ki para longkmie hi ka shait long ka rukom ba ki bun khana ha ka rukom kaba bniah la ia kiei kiei ruh. Ki rangbah briew te ia ka kam iing kim da smat eh ban iathuhkhana hynrei ha ki kynthei te ka dei ka sobjek kaba la jan baroh ki ktha bha ia ki. Ka jingshisha ka long hi ba ki kynthei ne ki longkmie ki kham iohi ia ki jingbunkam ha iing ban ia ki rangbah. La long shisha kum ki myntri pohiing bad myntri ka pla pisa. [yn dang bteng]
Phi don ban ong eiei?