La dep phah ia ka Administrator rule sha u Lat ka sah sa tang ban ap ia ka rai

Shillong: U Symbud Myntri Rangbah u bah Prestone Tyngsong hadien ba u la dep kynduh ia ki dkhot jong ka United Democratic Alliance(UDA) hapoh ka jingialam jong u bah Teinwell Dkhar, u iathuh ba u la dep phah ia ka Administrator Rule sha u lat ka Jylla u Agatatha Roy bad mynta ka sah sa tang ban ap ia ka rai na ka liang jong u Lat.

Haba iakren bad ki lad pathai khubor, na ka liang u bah Prestone u la ong “Ka jingphah jong nga ban pynjari noh ia ka Administrator rule ha KHADC ka long halor ka jingbym skhem jong ka party kaba don ha KHADC, namar ia mynta hi ki don mar 14 ngut ki MDC ha UDA bad 14 ngut ha UDF ha kaba kane ka lah ban khyllem biang ha kano kano ka por namar ba kam don ka jingskhem bad kumno kin rai bad kumno kin synshar”.

“Lada u shimti da uwei u CEM kumno kin synshar kumno kin rai, lada ka long kumne ha kano kano ka por, ka lah ban hap biang bad kane kan wanrah ia ka jingpyrkhat ba kin ialeh ia ka kam ban pynroi ia ki jait bynriew ne kin ia leh tang ban pynskhem ia lade kata ka wanrah ia ka jingeh ia u paidbah hi baroh kawei” u la bynrap

U la ong ruh ba kine ki jingjia ki long ba ka KHADC kam don ia ka 10th schedule bad ka sorkar ka dang ialeh ban pynrung noh ia ka 10 schedule ha ka 6th schedule, khnang ba ki lah ban tehlakam ia kine ki jingiaphet seng bad ba kin lah ban trei bha ia ka kam.