La dep kyrpad ia U President ban khot iakren, u ong ba um don por, ong u bah Adelbert Nongrum, halor ka jingshah sospon na ka VPP

Shillong:U bah Adelbert Nongrum, u MLA ka North Shillong Constituency, u la phah ka khubor sha ki nongialam ka Voice of People Party (VPP) ba um pdiang ia ka hukum ka party ban pynsangeh ka jinglong dkhot ha kane ka party bad kyntu ruh ia ki nongialam ka party ba ki dei ban khot ban iakren halor kane ka mat.

Lah ban kdew hangne ba na ka liang ka VPP, dangshen ka la pynmih ia ka jingpynbna ban weng noh ia ka jinglongdkhot (Suspension) ki 5 ngut ha ryngkat u MLA Jong ka VPP u bah Adelbert Nongrum na ka VPP, halor ka nongrim ba ki la iaid lait na ki kyndon ka party.
Haba kren sha ki lad pathai khubor u bah Adelbert Nongrum, u la ong ba ka long kaba lyngngoh ba kum ka party kaba kam ba ka dei ka party paidbah, wat la ha shwa ka election, la dep ban kyrpad ia u President ba Rangbah ka VPP u bah Ardent Miller Basaiawmoit, ban khot ia kren ban pynbeit ia ki jingbym iaid beit hapoh ka party, hynrei u President u la ong ba um donpor namar ka jingbun kam election hynrei kaba khraw hi ha kato ka por ka dei ban long ban pynbeit shwa ia ki kynrum kynram hapoh ka party.

“Kumba ngi iohi ba ki nongialam ka VPP ki la ong ba halor ka kam u bah Adelbert Nongrum kin sa ia kren ynda la dep ka election bad da la dep election hi ki la pynbna ia ban weng shipor ia nga na ka party hynrei kane ka dei ka rai kaba ki la dep lupa ban rai, hynrei ki khlem pynpaw pat sha u paidbah ha kato ka por namar ba ki tieng ioh ka ktah ha ka election, lada ki leh eiei ia nga” u la ong.
“Ki la ai ka showcause notice bad nga ruh nga la ai ka jubab hynrei kaba sngewlyngngoh pat kawei ka long ba kumno ki hun, ba ia nga u ba la don bynta lang ban pynlong doh long snam ia ka Voice of People Party (VPP) ban weng shipor na ka party haduh lai snem, kane kam dei ka jingweng shipor hynrei ka dei kaba ki la beh syndon ia nga na ka party” u la bynrap.

U bah Adelbert Nongrum u la ong ba ka jingkwah ba un rung sha ka VPP ka long halor ka dawbah bad um kwah ban rung ban mih bad kumta um pdiang ia kane ka jingweng shipor jong ka VPP bad kumba ki kam ba ym don uwei ruh u ban ha jrong ia ka party, ha u hi ka nongrim jong ka jaitbynriew ka dei kaba ha khmat tam.
“Nga kwah ban ong ia baroh kiba kyrshan ia nga ba wat la ngam ioh shuh ban kren ha ka kyrteng ka VPP, hynrei ngan kren kum ka sur u paidbah bad halor ka jingkynthoh hi ngam da sngew eiei namar naduh mynshwa hi nga ju mad. Bad kawei kaba donkam ka long ba nga khlem rung sha ka VPP ban pan ticket, hynrei nga rung halor ka nongrim, hynrei ka dei ka VPP kaba pynkhein ia kata ka jingiakut bad kim kwah ia nga u briew ba ju kren bad iai kren. Ka jingiaid lait jongnga pyrshah ia ka party ka long namar ba ki la pynkhein ia ka jingiateh halor ki mat Jong ki jaitbynriew” u la ong.

“Nga khlem mih na ka party bad nga khlem leh kaei kaei kaba kin pynbud nam ia ka party, hynrei nga leh ban kyntiew ia ka Jylla bad ban ioh nong ka VPP ngan ong tang kawei ba wat ju ialam bakla ia u paidbah.Ngam dei uba pyrshah ia ka party, hynrei nga pyrshah ia ka rukom pyniaid ia ka party namar ki la iaid lait ia ki kyndon ka party, bad ka dei ha ki paidbah ba kin bishar halor kane bad haba ki la wit ia nga balei kim pynmih syndon na ka party ki shu weng shipor ia nga” u la bynrap.
U bah Adelbert Nongrum u la ong ba ha ka kyrteng jong ki 5 ngut kiba la shah weng shipor na ka VPP kim hun bad pdiang ia kane ka jingshah weng shipor, hynrei ki kwah ba kin khot ban iakren shwa, da kaba kdew ruh “Lada nga bakla nga kloi ban panmap, hynrei lada ki bakla ma ki ngan shu ong ban map bad ban klet noh bad ha shwa ba ngan pynkylla ia ka nongrim jongnga kan bha ba ngan iehnoh sha dien ia kiei kiei baroh”.