La dep iamynjur lang, lada lyndet ka shong ha u kyrtong, ong ka MTD

Shillong:Ka Mawlai Town Dorbar (MTD) ka la pynshai kdar ba baroh ki kyrtong kiban iakhun ia ka MDC elekshon sha KHADC kila dep mynjur lang ia ka rai hynrei lada don kiba kwah ban lyndet, kata ka shong ha ki.
U chairman ka Mawlai Town Dorbar u bah Herlambor War haba kren sha ki lad pathai khubor mynta ka sngi, ula pynshai ba katkum ka jingialang hapdeng ka MTD bad baroh ki kyrtong kiban iakhun na Mawlai konstitwensi, la rai ba kin pyllong beit tang da ka Rynsan Ialap elekshon ia baroh ki kyrtong ne ka Common Platform khnang ban lait na ka jingpynwit pynthut ia ki samla kiba ialeh ia ki eksamin khamtam ka matrik.

Ha ka jingiakren sha ki lad pathai khubor ryngkat ka jingsynran lang ki nongkitkam ka MTD, u Chairman ula iathuh ba baroh ki kyrtong kiban iakhun kin ai ka jingkren ha ka common platform ban pynbeit ka shnong, bad ia ki jingdonkam baroh yn pynbiang ka shnong naduh ka jingpynsawa, jingpynbna paidbah bad ki kyrtong kin shu ianoh synniang ia ka bai jingpynsawa. Hynrei u chairman ka MTD ula pynpaw ia ka jingsngew sih ba don kawei ka seng sain pyrthei, kaba la thmu ban pynsngewthuh bakla ia ki paidbah ba ka Mawlai Town Dorbar ka khang ban ialap elekshon. U la ong ba ka Mawlai Town Dorbar kam shym la khang lad iano iano ban ialap elekshon bad kam don bor ban khang, hynrei lada ki kyrtong ki lyndet ia kaei kaba la dep rai lang, ka shong ha ki.

Lah ban kdew ba u nongaiktien ka seng Voice of the People Party (VPP) u bah Batskhem Myrboh ha ka Social media page, u la kynthoh pyrshah ia ka rai jong ka Mawlai Town Dorbar ba kam lah ban khang lad ban ialap elekshon.
U la ong ba la iamynjur lang bad baroh ki kyrtong ban don ka Common Platform ha baroh ki shnong kiba hap ha ka Mawlai Town Dorbar, khnang ban lait kano kano ka jingwit ia kiba pynkhreh ban ialeh eksamin, ban lait na ka jingsahkut kali.
Ka jingmut jong kane ka long ban lait na kano kano ka jingpynthut ia kiwei bad ban long kaba jai jai, ha kaba haba don ka Common Platform ha kawei ka shnong bad ki trai shnong kin ioh lad kham bha ban sngap tang ki trai shnong.

Ki don kumba 6 ngut kiban iakhun na Mawlai kiba kynthup ia u bah Process T Sawkmie, bah Teiborlang Pathaw kum ki kyrtong shimet, bah Eddieson Kharumnuid na ka VPP, bah Wanseng Jyrwan na ka Congress, kong Daniela Nonglait na ka BJP.