La bun snem khlem lah pynurlong, ia 20 tylli ki Residential School ha ka jylla

Nongpoh: Ka jingpynsahteng ka sorkar jylla ban pyntrei ne ban pyndep ia ki skul, kaba la tip paidbah kum kita ki Residential School, ka la pynbynniaw shikatdei eh ia kiba bun ki paidbah bad khamtam eh ia ki paidbah kiba sah hajan jong kito ki jaka, kiba ka sorkar jylla ka la sdang ban pyntrei ia kitei ki skul.

Na kaei kaba la lap, tang ha Ri Bhoi ki la don haduh lai tylli, kata kawei ha shnong Mawtari Myrdon kaba hap hapoh Umsning Block, ha shnong Nongrim Synjai kaba hap hapoh ka Umling Block bad kawei pat hapoh ka Jirang Block, hynrei ka long pat kaba sngewkhia ban tip ba na kitei ki Lai tylli, baroh ki dang sah khongreng bad khlem da lah ban pyndep lut.

Lah ruh ban kdew hangne, ba ia kitei ki Residential School, la sdang ban pyntrei naduh ka por ba ka sorkar Congress ka synshar ia ka jylla, hynrei tad haduh kine ki sngi kaba ka sorkar synroplang hapoh ka jinglamkhmat da ka NPP, ym pat la iohi soh eiei ba kitei ki Residential School kin urlong.
Ka long pat kaba sngewphylla, haba wad jingtip ba kiba kum kitei ki skul ki don haduh 20 tylli ha kylleng ki jaka hapoh ka jylla, ia kaba ka sorkar kam pat lah ban pyndep kat haduh kine ki sngi bad kaba la wanrah ruh ia ka jingduhnong kaba khraw ia ki kmie ki kpa jong ki khynnah skul, kiba la ap khmieh lynti ban ioh pynleit skul ia ki khun ki kti, ha kiba kum kitei ki skul.
Haba wad jingtip halor ka jingsah khongreng jong kitei ki Residential School, la ioh jingtip ba ia kitei ki skul ka thmu ban tei lyngba ka jingiarap na ka sorkar kmie, ia kaba ka sorkar kmie ka la pynmang pisa kaba T. 55 klur, sha ka tnat pule puthi jong ka sorkar jylla, na ka bynta ban tei ia kitei ki 20 tylli ki skul hapoh ka jylla.
Pynban na katei ka T. 55 klur kaba la pynmang da ka sorkar kmie, la ioh ban sei tang T. 25 klur, na ka bynta ban pyntrei ia kitei ki Residential School, hynrei kaba sah nangta ym pat lah ban sei bad kaba la poi kumba 4 lane 5 snem haduh kine ki sngi.
Shuh shuh, la ioh jingtip ruh ba namar ka jingbym dap katei ka T. 55 klur kaba la dep ban pynmang pisa, ka sorkar jylla ka la phah biang da kawei pat ka jingpynmang tyngka kaba thymmai bad kaba la kot sha ka T. 69 klur, na ka bynta ban pyndep lut ia baroh kitei ki skul kiba dang sahteng, hynrei kat haduh mynta ym pat ioh jubab ei ei ruh em.
Na ka jingwad jingtip da u Nongthohkhubor, la sngewthuh ba ka dawbah hi kaba la pynlong ia ka jingsahteng jong kitei ki Residential School, ka dei namar ka jingbymler da ki nongialam ka Sorkar jylla, na ka bynta ban pynurlong ia kitei ki skul, kiba ka sorkar kmie hi ka la thmu ban tei haduh 20 tylli ha kylleng ki jaka hapoh ka jylla, kata ha Ri Lum Khasi bad Garo.
Haba phai halor ka jinglong jingmang jong ka Residential School kaba la tei ha shnong Mawtari Myrdon, ki paidbah jong katei ka shnong, ki la khnium bha halor ka jingdon jong katei ka Building, namar ka la kylla long pynban ka iing jah bad ka ktem jong ki Awria bad ka jaka rieh jong ki riew shim kabu ha ka por mynmiet myniong.