Shillong, 13 Naitung:
Ki don haduh 10 tylli longiing na ka shnong Mawkliaw bad Kemrang ka thain War ki bym pat ioh jingiarap satia wat hadien ba ki la phah ia ka jingthoh sha ka ophis jong u BDO, ka Shella-Bholaganj naduh ba ki iakynduh ia ka jingulor ki iing ki sem ha u snem 2014 bad 2015.
Kat kum ki kot ki sla ba la phah sha u BDO, kine ki longiing lyngba u Rangbah Shnong ki la buh ia ka jingkyrpad lyngba ka jingthoh sha u BDO ba un thaw lad ban ai jingiarap kyrkieh ia ki hadien ba ki la iakynduh ia kane ka apot namar ba ki shem jingeh ban shna biang na ka jingduk jingkyrduh. Hynrei kaba sngewsih ka long ba ka jingap khmih lynti jongki, kam shym la urlong satia haduh kine ki sngi.
Namar kane ka jingleh bym suidniew ka bor sorkar, ki don kiba kiba iakynduh biang ia kane ka apot ha une u snem ba mynta ruh, kim treh shuh ban leit pan jingiarap na ka ophis u BDO namar ba ki sngewthuh ba kam don jingmut eiei haba tang ia ka jingiarap kaba rim ruh, kim ai eiei.
Katkum ka jingthoh ba ki la buh sha ka ophis u BDO, kine ki longiing lyngba u Rangbah Shnong ki la ong ba ki la iakynduh ia ka jingjia ha kaba ka eriong ka la wan ban syllad naphang ia ka iing jongki ha u bnai Jylliew, 2015 bad ki la kyrpad ba ka sorkar kan ai jingiarap na ka bynta ka jingeh ba ki iakynduh hynrei sngewsih haduh kine ki sngi, ka jingthoh aplikeshon ka long kumba bret kai.
Ha kawei ka liang, bun bah ki briew na thain Riwar Pynursla kiba iakynduh ia ka jingjia eriong ha u bnai Iaiong mynta u snem kim pat ioh jingiarap eiei na ka sorkar watla ka la iaid palat lai bnai eiei.
Ha ka jingiakren bad u nongthoh khubor, ki pynpaw ba ka sorkar kam shym la kit khia ia ki nongrep namar ba bunsien ki jingbuh aplikeshon jongki sha ka ophis u BDO kam ju phoida eiei ha kaba don kiba ioh jingiarap ka long tang shi damli katba ka jingjulor kaba jubor bha.
Ym tang ki don kiba ong ba lada ioh jingiarap ruh kan shim por da ki snem bad haba ka long kumno, kam don jingmut shuh kum kata ka jingiarap.
Phi don ban ong eiei?