La ailad ia ka HSPDP, KHNAM & Congress, la dei sa ka pali ka UDP

Shillong, 20 ’lyngkot:
Ka Executive Committee (EC) ka People Democratic Forum (PDF) ba ialam da u Bah Pynshngain N Syiem, kan lah ban khyllem noh shen ha kine ki sngi bad ka UDP ka lah ban shimti ban ialam ia ka EC.
“Ka jingkhih ka la don mynta, ngin sa peit sa ia ka por ba ngin ialam ia ka EC namar ba haba don ka lad, mano bym kwah ban synshar”, la ong u General Secretary ka UDP u Dr Jemino Mawthoh haba iakren bad u Rupang mynta ka sngi.
Ka jingsngew skhem ka UDP ban ioh synshar ha KHADC ka long hadien ba u MDC ba phet na Congress u Bah Albinus Lyngdoh u la pynthikna ban wan iasoh lashai bad nalor jongu, dang don shuh sa kiwei ruh ki MDC, tangba ka UDP kam pat kwah ban pynpaw kyrteng.
Ka jingkren jong une u nongialam ka UDP ka thaw ba ka UDA (United Democratic Alliance) ka kynhun synrop jong ki MDC shimet ha KHADC, kan sa lko pum ha kine ki khyndiat sngi namar ba ki MDC shimet kin mih ban kyrshan ia ka UDP.
“Naduh mynshwa, ngim ju kwah ban ialam ia ka EC, nyngkong ngi la ailad ban ialam da ka HSPDP hapoh ka jingialam u Bah Ardent M Basiawmoit, hadien da ka KHNAM da u Bah Adlbert Nongrum bad kham hadien ka Congress da u Bah Pynshngain N Syiem. Mynta ka la dei sa ka pali ka UDP ka seng riewlum kaba heh tam ha ka jylla ban ialam ia ka EC lada ka lad kan plie”, la ong u Dr Mawthoh.
Ka jingkhih sain pyrthei ha KHADC ka long hadien ba la mih ka elekshon MDC shiteng samoi khamtam ka jingjop jong u Bah HS Shylla na Nongkrem na ka UDP.
Katkum ka jingong u Dr Mawthoh, mynta ha KHADC, la ialam da ka kynhun bym don seng khamtam haba u Bah Pynshngain u la shah sospon na ka Congress hynrei u dang dei u Congress.
“Mynta ha KHADC la synshar da ki riew shimet, ym dei eh ki seng sain pyrthei, ym ithuh ithaw”, la ong u General Secretary ka UDP.
Hynrei haba kylli hato ka UDP ka la ioh ia ka jingbun paid ki MDC, u la ong, “Ngi la ioh ia ka jubab kaba biang na kiba bun ki MDC kiba la pynpaw ia ka jingkyrshan ban ialam ka UDP hynrei ngim pat lah ban pynpaw namar ba ka sain pyrthei, lah ban don ka jingkylla wat ha ka khyllipmat ruh”,.
U la ong ba ka EC mynta, ym lah ban kam ba ka long kaba skhem namar ba ka jingkhih ka la don tangba ka por kan sa batai ba ka UDP kan sa shimti ia ka bor.
U la pynkut da kaba ong, “Ngim dei kiba kwah bor hynrei haba ka lad ka plie, ngi kloi ban shimti ban ialam ia ka EC”,.
Ka UDP ka don 6 ngut ki MDC da ka jingwan iasoh u Bah Albinus ha ka iing kaba 30 ngut ha KHADC. Ka Congress ruh ka la kular ban kyrshan iaka EC ban ialam da ka UDP.