“LA AI HA NGI IA KA KTIEN U BLEI”

Dr. B.R. Marpna

Ia ka Ktien U Blei la ai ha ngi ba ngin pule bad pynleit jingmut khnang ba ngin lah ban san ha ka jinglong kaba kynja mynsiem. Haba ong “AI”, ka mut ba ngi dei ban shim bad ban pyndonkam ia ka. Ym ban buh kai ne pynitynnad hynrei ban puson ia ka, kaei ba ka don ban kren sha ngi lyngba ka Ktien jong U. U Blei U kren ia ngi lyngba ka sur na ka Ktien jong U. Hooid, ngi lah ban iohsngew ia ka sur (voice) jong U Blei ha ki bynta kiba pher bapher jong ka jingim jong ngi bad ha la ka rukom rukom ba U Blei U kren hynrei kawei na ka bynta ba U Blei ba U kren sha ngi, ka dei lyngba ka Ktien jong U. Ka lah ban pynwandur (shape) ia ka jingiadei jong ngi bad U Blei ha ka jingim kaba shimet shimet bad ha ka jingiadei bad kiwei ruh. Ka jingkylli kaba ngi lah ban buh, mano ba ai? Ka jubab ka long beit ba la ai ia ka Ktien U Blei da U Blei hi, da U Khrist bad da U Mynsiem Bakhuid.

1. La ai da U Blei: Naduh ka Testament kaba rim, ngi kynmaw ba kumno ba U Blei U la ai lyngba U Moses ha u Lum Sinai ia ki khun Israel hadien ka jinglongmraw na ri Ijipt. Te kumta ka dei kaba la ai ban sumar ia ki ain U Trai bad ka dei ruh kaba la kren na Bneng namar ba ki long ki hukum ban ialam sha kaba bha. “Me la hiar halor u lum Sinai ruh, bad me la kren bad ki na bneng, bad me la ai ha ki ia ki jingbishar bahok bad ki rukom bashisha, ki ain bad ki hukum babha” (Nehemaiah 9:13)

Shuh shuh, kam dei kaba la ai da ki briew hynrei kaba long kaba shisha ha kaba U Paul u kren ia kiba ngeit ha Thessaloni. U Paul u batai ba ngi dei ban sngewnguh ia kane ka Ktien. “Namar kane ruh ngi nguh ha U Blei khlem da pud, ha kaba phi la pdiang na ngi ka ka Ktien U Blei ia kaba phi la pynsngew, phi la pdiang ym kum ka ktien ki briew, hynrei, kumba ka long shisha kein, ka Ktien U Blei, kaba trei ruh ha phi kiba ngeit (1 Thessaloni 2:13)

2. La ai da U Khrist: Ka Ktien U Blei ka pynskhem ba ia kane ka Ktien, la ai da U Khrist ban pynskhem ia ka jingngeit Khristan jong ngi. Ka dei kaba la pynpaw lyngba jong Jisu Khrist bad kaba U Paul u kren ia kiba ngeit ha Galatia khnang ban pynshai ia ki shaphang ka Ktien U Blei. “Hynrei nga pyntip ha phi, ko para bangeit, shaphang kata ka gospel kaba la iathuhkhana ma nga, ba kam long katba kum u briew. Namar ngam shym la pdiang ia ka na u briew, lymne ym shym la hikai ia nga ha ka, hynrei ka la wan ha nga da ka jingpynpaw U Jisu Khrist” (Galatia 1:11,12)
3. La ai da U Mynsiem Bakhuid: Kane ka pynskhem ia ka jinglong lai ha uwei namar ba U Mynsiem Bakhuid ruh U don ka bynta ban ai ia ka Ktien U Blei khnang ban sngewthuh ia kiei kiei kiba kynja mynsiem bad ban iaibeh hir hir namar ba ym shym la ai da ka jingstad briew. “Ia kita kiei kiei ruh ngi kren, ym da ki ktien ba ka jingstad u briew ka hikai, hynrei ia kiba U Mynsiem u hikai da kaba ia pyrshang ia kiei kiei ruh kiba kynja mynsiem bad kiba kynja mynsiem” (1 Korinth 2:13)

U Blei Un Kyrkhu,