La 50 snem, tang ki kot khyndew ruh ka sorkar kam don, ong ka HITO

Shillong:Ka seng Hynñiewtrep Integrated Territorial Organization (HITO), ka la thoh mynta ka sngi, sha U Ma Lahkmen Rymbui, myntri ba peit ia ka kam poh iing bad ia ki district council bad ha katei ka dorkhas, ka HITO, ka pynpaw ia ka jingsngew kyndit kaba tyngeh, ba ka sorkar jylla, haduh mynta ruh kam don satia ia ki kot ki sla kiba biang, halor u pud u sam, wat haba ka jylla, ka la dei ban rakhe ia ka jingdap ba 50 snem jongka.

Ka HITO, ka dawa shuh, ba lada ka sorkar jylla, ka donkam eh ia ki dulir khyndew na ki District Council, kumta, ka dei ruh ban ialam lang ia ki khlieh jong kitei ki Council, ynda haba kan leit ban ia kynduh ia u myntri kam poh iing ka sorkar India bad ba kin nym long tang ki nongpeit kai narud bad ka HITO, ka ai jingmut ruh ia kane ka sorkar MDA, ba kan phai sha ka komiti, kaba la thaw ha ki snem 2012-13, kaba wad bniah halor ki kot ki sla, hapdeng ka Assam bad ka Meghalaya.

Ka HITO, ka dawa ba ka sorkar jylla, kan weng noh ia ka jing ithuh ia ki kot ki sla, da kaba ai da ka kyntien ‘Land Holding’ hynrei ba ki district council, kin ai da ka kyntien ‘Land Ownership’ sha baroh ki trai jaka.
Ka HITO, ka ai jingmut ruh ia ka sorkar Jylla, ba kan pyntrei kam shwa shipor ia ka ain ba la mynjur da ka Khasi Hills Autonomous District Council ha u snem 2018, halor ka ain inner line permit, tad haduh ba ka sorkar India, kan ai, ia ka ain kaba pura.

Katei ka seng, ka dawa ruh ba ha ka jing iakren kam pud bad ka Assam, ba dei ban kynthup ia ki kyndon, kiba la don, naduh ka por jong ka Federation of Khasi States, katba kum ki Clause 1, 2, 4 bad 5 jong ka Annexed Agreement jong ka Instrument of Accession, ha kaba la pdiang bad soi da U Shri. C Rajagopalachari, Governor General of India lem bad ki 25 tylli ki hima Khasi, ha ka 17tarik Nailar, 1948; hynrei katei ka seng, ka sngew diaw shibun ba ka sorkar India, kam shym la ithuh satia ia katei ka soskular.
Ka HITO, ka dawa namarkata, ba ka sorkar India, kan thaw noh ia ka komiti ban iakren kam pud bad ha katei kan kynthup ia ki dkhot na ka sorkar Meghalaya, ka Federation of Khasi States, ki autonomous district councils, khnang ba katei ka jingeh, kan poi syndon sha kaba ia hun mynsiem lang da baroh.