Nongpoh: Hynnin ka sngi saitjian, ka la don ka jingjied ban pynthymmai ia ki nongialam ba hakhmat ka KSU, North Khasi Hills District bad ha katei ka jingiajied u Samla Ferdynald K. Kharkamni, u la shah bynshet biang ba un iai long kum uta u nongialam ka KSU ha Ri Bhoi, khlem da don kiba iakhun pyrshah, namar ba baroh ki dkhot ka KSU na baroh ki Circle bad Unit, ki dang shanniah pura ha u ba un long kum uta u nongialam hapoh ka Distrik.
Lyngba katei ka jingshah jied kaba hynnin ka sngi Saitjain, kaba mut ba u samla Ferdynald K. Kharkamni, u la shah jied ia ka kyrdan kum u nongialam ka KSU ha Ri Bhoi la saw samoi kynthih.
Katei ka jingjied ban pynthymmai ia ki nongialam ka KSU ha sngi, ba la pynlong ia katei ka jingjied ban pynthymmai ia ki nongkitkam ka seng ha Ri Bhoi, la iohi ba ki la don da ki hajar ngut ki dkhot ka KSU ha Ri Bhoi na ki Unit bapher bapher ha Ri Bhoi, ki la leit ban iashimbynta ha katei ka jingjied thymmai ia ki nongialam ka seng.
Nalor u samla Ferdynald Kharkamni uba la shah jied kum u President, ki dkhot ka KSU ki la jied ia u Bah Lambok Rymbai kum u Vice-president, u Samla James Hitler Mawphniang, u la shah jied kum u General Secretary, u samla Steven Kharkrang kum u Asst. General Secretary, u samla Stevenson Kharkrang kum u Asst. Secretary, u samla Lester Nongbet kum u Organising Secretary, u samla Banjoplang Maring kum Education Secretary, u samla Richardroy Lyngdoh Nonglait kum Publicity Secretary, u samla John Lyngdoh, Office Secretary bad u Johny Nongrum kum u Sports Secretary.
Ia kitei ki nongialam ka KSU ha Ri Bhoi bad kiba la shah jied hynnin ka sngi Saitjian, shen kin sa shah pynskhem pat ha ki nongialam ka KSU Sengkmie, ha kaba ia ka Tarik bad ka por ba yn pynskhem ia ki yn sa pynbna pat hadien.
Phi don ban ong eiei?