La 2 bnai ym don por u MR, ban ia kynduh ia ka KSU

Shillong,31 Naitung:
Ka KSU lyngba ka tnad Education Cell jong ka ha ka kyrwoh khubor ba la pyllait paidbah myn ta ka sngi ka la pynpaw ia ka jingsngewsih kaba khraw halor ka jingbym patiaw u myntri rangbah ka jylla ia ka jingkwah ia kynduh jong ki ia u, kaba ki la dep ban pan sngi ban ia kynduh naduh ka 19 tarik u Jymmang,2015 bad katei ka jingkwah ia kynduh jong ki ka long ban ia kren halor ka jingeh kaba ia dei bad ka pule puthi ha ka jylla, hynrei ka kyrwoh ka la ong ba ka seng kam don lad shuh da kumwei pat ban pynpaw ia kitei ki jingeh sha ka sorkar lait noh da kaba pynpaw lyngba ki kot khubor. Ka la pynpaw ba ha u snem 2012 ha ka por ba u Prof.R.C Laloo u dei u myntri ba peit ia ka tnad pule puthi ka KSU ka la leit ban ia kren ia ki jingeh jong ka pule puthi ha ka jylla kaba donkam ban pynbeit hynrei ka la ong ba ki jingiakren kiba mih kim shym la pynhun ia ka seng.
Ha ka kyrwoh khubor ka KSU ka la kdew ba ki jingeh ha ka pule puthi ha ka jylla ki kynthup ia ka jingpynkiew bai skul ki katto katne ki jaka pule khamtam ki skul shimet kaba khlem kano kano ka jingshai, kaba la paw kumba ki jaka pule ki kwah tang ka pisa bad kim shym la pyrkhat ia ka jingeh jingjynjar ki kmie ki kpa jong ki khynnah pule, bad ka la ong ba katei ka la ktah bha ia ki khynnah pule kiba wan na ka longing kaba duk.
Kawei pat ka jingeh ka KSU ka la ong ba ka dei ka jingpynkylla Syllabus kaba khah khah naduh klas I haduh klas IV kaba la pynkulmar khlieh ia ki khynnah pule. Shuh shuh ka KSU ka la kdew ba kawei pat ka mat ka jinghukum ki skul ia ki khynnah ba ki dei ban thied ia kot skul , ki jain skul tang na kito ki dukan ne ki jaka kiba ki la bthah, ha kaba teng teng ka la mih ruh ka jingthok ia ka dor jong ka kot dakaba tah stikar da kawei pat najrong jong ka dor trai, ka la ong ba katei ka dei ka buit jong ki katto katne ki skul tang ban ioh kamai komishon. Nangta ka la kdew ba kiwei pat ki jingeh ki dei ka jingpynkiew jong ki jaka pule ia ka dor jong ki phom rung skul, kaba la ktah ia ki khynnah pule. Ka jingbym long ryntih ki skul ban pynbna ia ka kyrteng ki khynnah kiba ioh rung skul ruh ka dei kawei pat ka jingeh , ong ka KSU naba ki khynnah pule ki shem jingeh ban shim rai sha kano ka skul kin leit rung skul.
Halor kitei ki jingeh ba ka KSU ka la kdew, ka la dawa na ka sorkar jylla ba ka dei ban thaw ia ka bor ka ban pynbeit ia baroh kitei ki jingeh kaba ia syriem ia ka Meghalaya Private Universities Regulatory Board (MPURB) w ban peit ia ka rukom treikam ki skul bad ki kolej ha kane ka jylla. Ka la ai jingmut ruh ia ka sorkar ba ka dei ban pyntreikam noh ia ka jingpule ei ia ki khynnah ( free and compulsory education) haduh ba kin kot sha ka 14 snem karta.
Nangta ka la kdew ruh ia ka jingduna palat ki kolej sorkar ha kane ka jylla bad ka la dawa ba ka sorkar ka dei ban seng kolej ha baroh ki District ban kyntiew ia ka pule puthi ha ki thain nongkyndong. Ka KSU ka la dawa ruh ban kyntiew kyrdan ia ka Polytechnic kaba don mynta sha ka jaka pule Enjiniar kaba pura. Ka la kyntu ruh ia ka sorkar ba kan pynbor ia ka North Eastern Hill University ba kan pynsted ban thaw noh ia ka jowai Campus jong ka khnang ba kan pynmyntoi ia ki Ar tylli ki ki district ka ri Lum Jaintia.
Ka Union ka la kyntu ruh ia ki samla pule kane ka jylla ba kim dei ban leit rung klas ha Damkan paramedical college/ Damkan University mynta u snem namarba ki pulit ki dang tohkit ia katei ka jaka pule kaba la kynnoh ba ka shukor ia ki samla pule ka thain shatei Lam mihngi. Ka la ong ba katei ka jaka pule ka la kam ba ka dei kaba ia soh bad ka Vinayaka Mission University, Chennai, Tamil Nadu hynrei ka seng ka la lap na ka Vinayaka Mission University ba ka dei tang ka jaka pyntip, ka la ong ba bun ki khynnah pule na kane ka jylla ki la ngat ha katei ka jingshah shukor. Ka KSU ka la pynpaw ruh ka jingsngewlem halor ka jingkhlad noh u President barim ka ri u Dr.APJ Abdul Kalam.