Kyrshang tyngeh ka RBYF ia ki RS

Nongpoh,
02 Naiwieng:
Ka Ri Bhoi Youth Federation (RBYF), sengkmie ka la ai ia ka jingkyrshan kaba radbah ia ka jingdawa jong kane ka Synjuk ki Nongsyn shar Shnong ka Bri u Hynniewtrep  ba ka sorkar jylla ka dei ban pynlong aiñ noh mardor ia ka VAB, 2015 bad kiwei kiwei ki jingdawa ba la pynbna da ka synjuk.
U president ka RBYF u Bah Bipul Thangkhiew u la ong ba seng ka la pynpaw ia ka jingkmen halor ka jingiasnohktilang ki paidbah baroh jong ka Ri Khasi Jaintia ban ia shimbynta ha katei ka proseshon bah ha ka 30 tarik Risaw ba la pynlong da ka synjuk ki nongialam shnong.
“Ka Ri bad ka Jaidbynriew ka donkam kyrkieh ia ka jingiatylli, ka jinglong kawei ban iakhun halor ka nongrim ban iada ia la ka jaidbynriew kaba kyrpang bad ia ka jylla hi baroh kawei kaba don mynta hapdeng ka saw ka siañ tang namar ka jingmutlop jong ka sorkar jylla ban pynlong aiñ noh mardor ia ka VAB kaba dei ka jingpynkupbor ia ka iktiar ki nongialam shnong bad ruh kaba long ka stieh jong ka Jaidbynirew”, ong u Bah Thangkhiew.Ha kawei ka liang ka RBYF ka la pynthymmai ruh ia ki nongkitkam jong ka Mawrong Unit kynthup ia u samla Kyrshanlang Syiem kum u president, Wanbha Lyngdoh, Vice President, Secretary Aibor Lyngdoh, Organizing secretary B.P Syiem, Sport Secretary Renol Moksha, Education secretary Broken Nongkseh, Finance Francis Lyngdoh lem bad kiwei kiwei ki dkhot ka EC. Ha kawei ka liang ka Dorbar ki Rangbah Shnong Ri Bhoi District (DKRSRBD) mynta ka sngi ka la ai khublei kyrpang ia baroh ki paidbah bad baroh kito kiba ai jingkyrshan ha katei ka proseshon ba la khot da ka Synjuk ki Synjuk ki Nongsynshar Shnong ka Bri u Hynniewtrep.  U Bah C.B Syiem, Secretary u la ong ba ka synjuk ka dap da ka jingkmen ban sakhi ia ka jingkyrshan kaba radbah kaba ki paidbah nongshong shnong ka them Ri Bhoi ha katei ka sngi.Ka DKRSRBD ka kyrmen skhem ba ki paidbah kin nang ai ia ka jingkyrshan kaba radbah tad haduh ba ki jingdawa jong ki nongialam shnong kan urlong kumjuh ruh ba kin sa ia shimbynta ruh ha ka jingleit tur sha ka Secretariat ha ka 5 tarik u Naiwieng ban dawa ba ka sorkar jylla kan pynlong ain noh mardor ia ka VAB bad ruh ban pynurlong ia kiwei kiwei ki jingdawa khamtam ka jingdawa ban hiar shuki noh jong u Myntri Rangbah u Dr. Mukul Sangma lem bad kiwei kiwei ki myntri jong ka sorkar jylla, ki la bynrap.