Shillong: U Myntri Rangbah ka jylla u Conrad K Sangma ula kyrshan ia ka jingthmu ban pynlong tang kawei ka jingjied ia ki MP, MLA ne ka One Nation One Poll.
“Kawei ka ri, kawei ka jingjied ne elekshon, ka dei kaba biang bha ban lait na ka jinglut jingsep, kan wanrah ia ka jingtbit bad ka jinglait na kiei kiei ki jingdkoh’, la ong u Conrad.
Hynrei na ka liang u Conrad u la ong ba ka donkam shwa ban iathir bniah ia kane ka kam namar ba ym dei ban iaid sted. “Ka dei kaei kaei kaba don jingmut hynrei ka donkam ban iasyllok shwa kham bha ia ki seng sain pyrthei, ia ki kynhun”, la ong u Conrad.
U la ong ba u Myntri rangbahduh ka ri, u Narendra Modi u la pynpaw ba kane ka jingmut kam dei ban leh khohreh hynrei ka dei tang ka jingsdang ban poi sha ka thong.
“Ka dei tang ka jingstad bad kam dei ka mat jong ka sorkar hynrei kane ka mat ka dei jong ka ri baroh kawei’, la iathuh u Conrad ia ka jingkren u Modi.
Ha kawei ka liang, u Conrad u la iathuh ba la iakren ruh ia ka jingtreikam ka Parliament ha kaba u la dawa ba dei ban ai nongtrei ia ki MP bad ban kiar na kaba iakyrkait namar ba kam nym wanrah jingmyntoi hynrei ia ki MP dei ban bishar da ka jingiashim bynta ha ka jingiatai hapoh parliament.
La iakren ruh ia ka jingrakhe dap 75 snem ka jinglaitluid ka India bad ka jingrakhe ia ka sngi kha u Mahatma Gandhi bad ban kyntiew ia ki district kiba dang sahdien.
Phi don ban ong eiei?