Shillong: Ka Synjuk ki Nongsynshar Shnong ka Bri U Hynniewtrep (SNSBH) ka la shong jingialang kyrkieh myn hynnin ka sngi ka la rai ban kyrshan tyngeh ia ka Khasi Author’s Society (KAS) halor ka jingialang paidbah ka ban long ha ka 22 tarik Nailur 2018 ha madan Iewrynghep ban pynpaw paidbah ban dawa ban pynrung ia ka ktien khasi ha ka khyrnit kaba phra jong ka riti synshar ka Ri India.
Ka Synjuk da kawei ka sur ka la rai ban kyrshan tyngeh ia katei ka jingthmu ba kordor jong ka Khasi Author’s Society bad ka kyntu ia ki paradoh parasnam ka bri u hynniewtrep ban ai ia ka jingkyrshan ba ratbah ia katei ka jingthmu da kaba ia mih paidbah lang ha katei ka sngi, ka por bad ka jaka ba la batai. Ka Synjuk ka kyrpad ruh ia ki dorbar shnong ban pynbna paidbah lang ia katei ka jingialang ha ki shnong jong ki lada ka long kaba lah, la ong u Bah R. L. Blah u General Secretary ka SNSBH.