Kyrshan ki Waheh Shnong Narpuh, ban pynkylla ia ka bhah kam

Shillong:Ki Waheh Shnong napoh Narpuh (Border) kaba hap hapoh ka Ri Lum Jaintia, ki ai ka jingkyr shan kaba pura, ia ka jingiakhih jong u Bah Ardent M. Basaiawmoit, na ka bynta ka ka jingdawa ban pynkylla ne pynthymmai noh ia ka Reservation Policy (State Job Reservation Policy). Kane ka jing kyrshan jongki, ka long namar ka jingia khih ka long kaba don nongrim na ka bynta ka jingbha jong ka lawei ki khun ki kti jong ngi hapoh ka bri u Hynniewtrep.

Kitei ki Rang bah Shnong, ki ong, ba lada long kumno kumno ruh, kin ai jingkyrshan pura ia u Bah Ardent nangne shakhmat bad lada jia ban mih iamih paitbah ruh kin iamih ha kano kano ka por.

Ha kaba iadei bad ka jingdawa jong ka Synjuk Waheh Shnong Ri Jaintia, kaba mih hapoh Social Media, kim don kano kano ka jingtip bad kim don bynta hi ruh ban pharia ia ka Jaitbynriew, hynrei ki ialong shitylli (kawei) kum kawei ka Jaitbynriew kaba ong, “Khynriam u Pnar u Bhoi u War, u dei u pait Khasi baiar”, ong ka kyrwoh na u ma Lasting Pala, Waheh Shnong Umkiang, ma Jenisal Pohkyrnu, Waheh Shnong Dona Skur, u ma Love You Bareh, Waheh Shnong Pyrtakuna, u ma Min Lamare, Waheh Shnong Kuliang, ma Sharai Lamare, Waheh Shnong Borsara, ma Edimon Lamare, Waheh Sonapyrdi, ma Fantin Pajat, Waheh Shnong Lumphyllut, ma Pynkhlain Dhar, Waheh Shnong Ratacherra, ma Wol Tariang, Waheh Shnong Dona Umbluh, ma Robi Suchiang, Waheh Shnong Umstain, ma Mit Dkhar, Waheh Shnong Lahalein.