Kyrshan ki paidbah ka thain Patharkhmah  ia ka CSWO

Nongpoh, 14 Risaw:
Ka jingialang jong ki paidbah ka ri Bhoi sepngi kaba la long hynne ka sngi ha Patharkhmah, ki la shim ia ka rai ban kyrshan ia ka jingdawa ka CSWO hapoh ka jingialam ka Kong Agnes Kharshiing ban aiti beit ia ka jingtohkit ha ka tnad CBI halor ka jingiap jong u pulit PJ Marbaniang.
Ki riew rangbah ka thain ki la pynlong ia ka jingialang kaba kyrkieh hadien ba la sngew khia jur ia ka jinglong jingman ha katei ka thain.
La wan shim bynta bun bah ki riewpawkhmat kane ka thain, ki nongialam niam, ki sordar bad ki rangbah shnong la pynlong ha Ingdorbar jong ka Pathakhmah.U Bah Centre Doloi u la iathuh ba ki riew rangbah jong kane ka thain ki dap shisha da ka jingsngewkhia halor ka jinglong jingman jong ka thain khamtam ka la shah ktah ruh ha ka nam ka burom jong ka thain hadien ka jingjia ha ka Police Outpost jong ka Patharkhmah.U Bah Doloi u la ong ba ka jingialang ka la kyrpad bad kyntu ia ka sorkar jylla ba kan shimkhia ha kaban tohkit bniah da kaba khuid ia kane ka jingjia khlem kano kano ka jingshah liang. “Ki riew rangbah ki la sngew dei ban ai ia ka jingkyrshan ia ka CSWO ka Kong Agnes Kharshiing kaba la dawa ban aiti noh ia ka jingtohkit sha ka CBI khnang ba ka jingtohkit kan long shisha kaba khuid bad kaba tih bniah bha”, u la ong.
U la ong ba ka thain ka dei ba dang sahdien ha baroh ki liang bad ki paidbah ki donkam ia ki ophisar kiba trei hok, kiba khuid ha kaban ai jingshakri khlem da shah shiliang. “Ka Ri Bhoi sepngi ka kwah ban ioh noh da ki ophisar kiba kum kine, khamtam ha ka liang u Ophisar In-charge jong ka Patharkhmah outpost bad ruh u BDO ka Jirang C&RD Block”, u la ong u Bah Doloi.