Kyrshan ki nongshong shnong ka Brichyrnot, ia ka Star Cement

Shillong:Ki nongshong shnong jong ka shnong Brichyrnot, kaba hap ha East Jaintia Hills, ha ka jingiakynduh bad ki lad pathai khubor, ki la pynpaw ba na ka liang ka shnong ha ryngkat bad kiwei pat ki shnong ba marjan, ki la kyrshan ia ka jingthmu jong ka Star Cement’s ban tih mawshun ha kane ka shnong ha ka jingiar kaba 42.051 hectares.

U Bah Stanley Massar, uba dei u Rangbah Shnong jong ka Brichyrnot, u la pynpaw ba ki nongshong shnong ki ai ka jingkyrshan ia ka Star Cement Company ha ryngkat lang bad u MLA kane ka thaiñ, u Ma Shitlang Pale. U la iathuh ruh ba ha kane ka shnong, mynshuwa ki don tang kumba 15-20 tylli ki thliew ïing, bad katba dang iaid ki por, ki la don mynta haduh 60 tylli ki thliew ïing, bad ka jingbun briew ki la don kumba 360-370 ngut.

Ha kaba iadei bad ka jingkyrshan ka jong ki ia ka Star Cement, u Bah Stanley u la iathuh ba ha ki snem 1988-89, kane ka shnong ka long kaba duk, kim shym don ka surok, ka umbam umdih kam da biang, ka jaka ai jinghikai kim don bad wat ka jaka ban thung ban tep ym don bad namar kine ki jingeh, ki nongshong shnong ki la phai khmat sha ka Star Cement ban ai jingiarap, bad dei lyngba ka jingiarap jong ka Star Cement, ka la pynsuk shibun ia ki paidbah kane ka shnong.

U la ong, “Naduh ba la sdang ban pyniaid ia kane ka kompani, ka shnong ka la sakhi ia ka development lyngba ki lad ai jingiarap ki bapher bapher bad ka la pynsuk shibun ia ngi, bad wat ki khun samla jong ka shnong ruh ki la ioh kam ioh jam lyngba ka jingiarap kane ka kompani.”

Haba kylli halor ka ishu jong ka public hearing kaba la hap ban pynsangeh noh dang ha une u bnai ba ladep, na ka liang u bah Stanley u la iathuh ba ki nongshong shnong jong ka Brichyrnot ki la sngewsih halor ka jingshah pynsangeh noh kane ka public hearing halor ka jingpynshai ia ki nongshong shnong, na ka bynta ka jingtih ia u mawshun kaba la shah pynthut noh ha ki katto katne ngut ki paidbah kiba pyrshah ia kane ka kompani.

U la pynpaw ba kane ka jingshah pynthut noh ka public hearing ka long ka jingduh kaba khraw ia ki nongshong shnong, namar khlem ka Star Cement, kim lah ban ioh ia ka development.

Na ka liang u Assistant Rangbah Shnong, u Bah Carmelus Massar, u la iathuh ba lyngba kane ka jingtih mawshun kane ka kompani, kan nym don jingktah satia ia ka mei mariang, naba ki ladep ban iateh ia ka dulir ba kin sa thung dieng biang ha kine ki jaka bad ia kane ka jingtih ia u mawshun, yn leh da ka rukom bathymmai kaban lait ban ktah ia ki jingthung jingtep bad ia ki mrad ki mreng kiba don ha kane ka shnong.

“Kito kiba wan pynthut ia ka public hearing ha u bnai ba ladep, kim shym la leit wat tang shisien ruh sha kiwei pat ki jaka ban peit bad ban khmih hi halor ka long ka man ban shong shngain lada tih mawshun da kane ka kompani. U la ong ruh ba kine ki briew kidei ban wan iakren shuwa bad ki nongshong shnong lada ki pyrshah khnang ba kin ioh ia ka jingpynshai bad kane ka jingtih ia une u Mawshun kan nym ktah ruh ia ka Narpuh Wildlife Reserved Forest kaba don kumba ar kilometre na kane ka jaka ba thmu ba tih mawshun.

Ha kajuh ka por, la iathuh ba ka Star Cement ka la shimkhia ruh ha ka jingpynbiang ia ki khynnah jong kane ka shnong da ki blackboard, ki miej, ki shuki, ki kot ki sla, ki pla skul, ki let ki khulom na ka bynta ki jingdonkam jong ki khynnah ia ka jingnang jingstad.

La iathuh ba ha kane ka shnong ki la don naduh klas Nursery haduh klas 5 bad kumba 95 ngut ki khynnah pule bad ki la don ruh katto katne ngut ki samla kiba la ioh ia ki training bapher bapher shaduh shabar ka jylla lyngba ka jingiarap ka kompani Star Cement ha kaba kine ki samla ki la ioh ban kam bad ki la lah ban iarap lem ha kaban wanrah jingstad ia kiba sah ha kane ka shnong.