Shillong: Ki nongshong shnong jong ka Shella kiba shong basah ha nongbah Shillong ki la lum jingialang ha ka sngi saitjaiñ jong ka taiew ban ia kren halor kumno ban wanrah biang ia ka shongsuk shongsaiñ hapoh ka shnong Shella kaba don hapdeng ka kynrum kynram. Haba ia kren bad ki nongthohkhubor u wei na ki nongshong shnong u bah Pynkmen Sanmiet u la ong ba ki nong Shella kiba sah ha Shillong ki kyrshan ia ki paidbah kiba pyrshah ia ki 14/15 ngut ki briew kiba wanrah ia ka huri hura hapoh shnong. U la ong ba kitei ki briew ki kam ialade kum ki Executive Member jong ka Dorbar Shnong hynrei ha Shella ym ju don Executive Member lane Executive Committee. U la ong ba ki dkhot ki dei kito kiba iarap ia u Secretary tang ban soi ia ki mat kiba dei ban wanrah hapoh dorbar.