Nongstoiñ: Ki saw tylli ki Sengbhalang ka thaiñ WKHD kila ai ka jingkyrshan kaba pura ia ka jingpyntreikam da ki kyndon aiñ ka KHADC lyngba u EM ka tnad khaii pateng u bah Paul Lyngdoh bad ryngkat ka jingia treilang jong baroh ki dkhot jong ka Council ban khynra ia ki kot ki sla sha baroh ki nongshong die madan kiba kynthup ia ki bar jylla bad ia ki trai jylla hapoh Khasi Hills bad ruh ban pynjur shuh ia ka jingkhynra trading lisen ia ki bar jylla ki bym don kot don sla ha ki iew ki hat bad ki bym bud ia ki kyndon ain jong ka KHADC.
Kitei ki saw Seng kiba kynthup ia ka HYC,WYF ka HANM West Khasi Hills bad ka WKSU ki ai ka jingiaroh ia ka jinglah ka Council ban pyntreikam hok ia ki ain ki ka nun kiba la thaw bad don lypa na ka bynta ban pyniaid beit iaid ryntih ia ki nongshong die madan bad kumjuh ruh ia ki nongshong dukan ha ki iew ki hat khnang ban lait na kino ki jingia tyngkhuh ha pdeng ki nong die bad nong thied bad kum juh ruh ban teh lakam ia ki briew ba na bar kiba shu shong iew pathar khlem da bud ryntih ia baroh ki kyndon ain ba la bynshet haki.
Ki saw seng ki kyrpad ia ki nongshong die madan trai jylla ba kin ia treilang bad ka jingbthah jong ka KHADC halor ka jingpynrung kyrteng ia ka jingshong iew die madan khnang ba kan long ka ba iaid beit iaid ryntih ha baroh ki liang bad ki la pynpaw ruh ba ka long ka jingkyrkhu bad jingshong shngain ia ki trai ri trai muluk lada kin bud ryntih ia ki kyndon ain kiba ia hap bad ki riti ki tynrai.
“Ngi la jied ia ki nongmih khmat lada dei ha Legislative Assembly ne ha KHADC bad ha kaba ki nongmih khmat jong ngi ki thaw ia kita ki ain ki ban ai jingiada ai jingmyntoi bad ai jingshngain ia ki trai ri muluk hi, te ka la dei ka por ia ki trai ri trai muluk ban ia treilang bad ki bor ki ba dei khmih ia kane ka kam khnang ba ka lawei jong ngi kan tyngshain na ka bynta ki long mynta bad kham tam eh ia ki longdien mandien jong ngi” ong ka kyrwoh khubor na kitei ki saw Seng.
Phi don ban ong eiei?