Kyrshan ka VPP, ïa ka jingpakhang surok ba khlem buh por ka JAC

Shillong:Ka Voice of the People Party Narpuh Circle ka la rai ban ai jingkyrshan pura ïa ka JAC jong ka Dong Namchiang halor ka “Indefinite strike” lane ka jingpakhang surok khlem buh por ka ban sdang naduh ka 19 tarik Jylliew 2024.

Ka VPP Narpuh Circle ka pynpaw ïa ka jingsngewkhia kaba jur halor ka jingsniew palat pud u surok NH-6 khamtam ha ka thaiñ Narpuh ha kaba ka jingïaid lynti ka long kaba jynjar ïa ki nongshong shnong bad ïa kiwei ruh kiba dei ïaid lynti na une u surok kiba dei na kiwei pat ki jylla jong kane ka thaiñ shatei lammihngi ka ri India.

Kumta halor kane ka jingeh na ka liang ka VPP Narpuh Circle ka lah ïakynduh ruh bad u MP ba thymmai Dr. Ricky AJ Syngkon bad ka la pan jingïarap ruh na ki nongïalam ka party ban ïarap kren lem sha ka sorkar jylla na bynta kane ka jingeh jong ki nongshong shnong namar ka nongmihkhmat ka thaiñ ka Kong Santa Mary Shylla kam lah ban pyndep ïa ki jingkular jong ka halor une u surok.

Ka VPP Narpuh Circle kan ai ka jingkyrshan ba pura ïa ka JAC ha kino kino ki jingïakhih ba shakhmat halor une u surok. Ka party ka khot ka wer ruh ïa baroh ki nongkyrshan ban ai ka jingïasnoh kti lang ryngkat bad ka JAC khnang ba ka dong ka thaiñ kan ïoh noh ïa u surok uba bha, ong ka khubor ba la pyllait da ka kong Deiwi Tongper, President VPP, Narpuh Circle.