Nongpoh:Myn hynnin ka Sngi Saitjain, ki rangbah shnong kiba hap hapoh ka Raid Nongtluh, ha ryngkat ki nongialam ka seng RBDYSO, ki la pynlong ia kawei ka jingialang ha Umden, kata na ka bynta ban dawa na ka sorkar jylla ba ka dei ban pynurlong noh ia ka Umden C&RD Block.
Lyngba katei ka jingialang, kitei ki rangbah shnong ha ryngkat ki nongialam Raid Nongtluh bad RBDYSO, ki la pynpaw ba ka thain Umden, ka la donhok ban kyntiew kyrdan C&RD Block, namar ka dei ka thain kaba la kdup ia kiba bun phew tylli ki shnong bad kiba la jngai eh, la ka long na ka Umling bad Umsning C&RD Block.
Haba kren sha ki lad pathaikhubor, u Bah JM Syiem, President Synjuk ki Rangbah shnong hapoh ka Raid Nongtluh, ha ryngkat u Bah Arnold Syngkli, ki la pynpaw ba lyngba katei ka jingialang, ki la shim ia ka rai ban pynjur ka jingdawa ia ka Umden C&RD Block, namar katei ka thain ka la donkam eh ban ioh ia C&RD Block, namar ba kan sa long shisha ka jingmyntoi ia ki nongialam shnong bad khamtam eh ia ki paidbah kiba sah ha katei ka thain.
Ha kawei ka liang, ki la ai ka jingiaroh ia u MLA bad MDC na Nongpoh, kiba la shimkhia eh halor katei ka mat, da kaba ki leit syndon ban kynduh ia u Myntri Rangbah, na ka bynta ban dawa ia ka Umden C&RD Block, kumta na ka liang ki nongialam ka Synjuk ki nongialam shnong na katei ka thain, ki la kyrshan eh ia katei ka mat bad kiba la pynjur ia ki jingdawa, da kaba ong ba la sorkar ka dei beit ban pynurlong ia ka Umden C&RD Block.
U Bah JM Syiem, u la pynpaw ba ki la don shibun ngut ki nongialam shnong na katei ka thain, kiba la kynduh shibun ki jingeh wat tang ban leit sha Umling C&RD Block, namar ba la jngai palat ka lynti kaba ki hap ban iaid, ha kaba don ki khep tang na ka bynta iwei ki jingdon barit eh ha Block, la donkam ban iaid da ki phew phew Kilomiter bad kaba la ktah eh ym tang ia ki nongialam shnong, hynrei wat ia ki paidbah ruh kumjuh.
Phi don ban ong eiei?