Kyrshan ka Sorkar India ia ka Meghalaya National Games 2022

Shillong: U Kiren Rijiju, Union Minister, Ministry of Youth Affairs & Sports u la ong ba ka tnad jong u ha ryngkat ka Sorkar India hapoh ka jingialam u MRD, bad ha ka jingiatreilang ryngkat bad ka Sorkar Meghalaya, ki shim khia na ka bynta ka Meghalaya National Games 2022 namar ka dei ruh ka burom jong ka Ri India. Ia kitei ki kyntien u la ong ha ka jingiakynduh bad ki nongkitkam jong ka North East Olympic Association, ha ophis trei kam jong u ha New Delhi, myn hynnin ka sngi.

Ha katei ka jingiakynduh na ka liang ka NEOA ki la ai ka dorkhas ban iarap ia ka jylla Meghalaya na ka bynta ka National Games bad u la mynjur ban bishar bniah ia kitei ki jingai jingmut na ka NEOA. U la ong ruh ba u dap da ka jingkmen ia ka jingiatylli ki Olympic Association na ka NE ban kyntiew ia ka kam ialehkai bad mynjur ruh ban ia kren bad u Myntri DONER ban kynthup biang ia ka phang “sports development” hapoh ka thup treikam jong ka North Eastern Council(NEC), kaba la shah weng khyndiat bnai mynshwa kaba la buh ia ki kynhun ialehkai ha ka jingeh kaba khraw. U la pyntip ba ka tnad Sports ka dang pynkhreh bun ki kam ha kiba bun ki liang ban iarap kyntiew ia ki kam ialehkai.
Ia katei ka jingialang la lam khmat da u President ka NEOA u Th. Radheshyam, Myntri Sorkar Manipur President Manipur North East Olympic Association, ha ryngkat u BK Roka, President Sikkim Olympic Association & Working President, NE Olympic Association, u Abraham K Techi, General Secretary, Arunachal Olympic Association, & Secretary General, NE Olympic Association, u Bah John F Kharshiing, Working President, Meghalaya State Olymlipc Association & Treasurer, NE Olympic Association, u Sunil Elangbam, General Secretary, Manipur Olympic Association, & Secretary, NE Olympic Association, u C Laltlanthanga, Secretary General, Mizoram Olympic Association, & Vice President, NE Olympic Association bad u Meren Paul, General Secretary, Nagaland Olympic Association Executive Member, NE Olympic Association, kane ka long katkum ka kyrwoh na u Bah John F Kharshiing.