Shillong,14 Nailar:
Ka Meghalaya Peoples Human Rights Council (MPHRC) Central Executive Committee ha ka jingialang jong ka myntaka sngi ka la pynpaw ia ka jingkyrshan jong ka ia ka jingthmu ka sorkar MUA-II hapoh a jingialam u Dr.Mukul ban thaw ia ka State Human Rights Commission kaba pura ha ka jylla.
” Ka jingthmu ban thaw ia ka State Human Rights Commission ka dei ka jingdawa kaba la kham slem jong ka MPHRC naduh u snem 1996, ha kaba u Myntri Rangbah barim u Salseng Marak u la ai ksai bad tyrwa sha ki Myntri Rangbah jong ka thain shatei Lam mihngi ia ka jingdonkam ban don tang kawei ka Human Rights Commission bad kaba la pynduh pyndam noh ia katei ka jingtyrwa hadien ba la seng ia ka State Human Rights Commissionha ka jylla Assam bad Manipur” ong ka kyrwoh na a MPHRC.
“Ka rai jong ka sorkar ka dei ka dak ka jingpdiang sngewbha bad ka jingthaw ia ka State Human Rights Commission kan kyntiew shuh shuh ia ka jingiaksaid na ka bynta ka jingithuh , ka jingkyntiew bad ka jingiada ia ka hok longbriew manbriew ha ka jylla. Kane ka commission kaba thymmai la khmih lynti ban bud ia ka nongrim jong ka Paris kaba dei ka jingpyniaid ryntih ka pyrthei baroh kawei na ka bynta ka hok longbriew man briew” ong u Bah Dino D.G. Dympep, Chairperson ka MPHRC.
Ka MPHRC ka la ong ruh ba ka jingseng ia katei ka State Human Rights Commission kan iarap shibun ban pynshai paidbah bad ban the-la-kam ha ka hok longbriew manbriew, kan iarap ruh ia ki paidbah ban ioh ia la ka jong ka hok ha ka jingialeh jong ki khlem da pynlut pisa tyngka bad kumjuh ruh ka por. Ka MPHRC ka la ong ruh ba katei ka seng hok long briew man briew kan long kum ka jingkieng kaba pun hapdeng ka sorkar bad ka imlang sahlang ban ia kren ia ki mat ba donkam.
Phi don ban ong eiei?