Kyrshan ka HANM ia ka jingdawa ki nonghikai SSA

Shillong, 07 Rymphang:
Ka HANM West Khasi Hills, ka la ai ia ka jingkyrshan ba tyngeh ia ka jingiakhih bad ka jing dawa jong ki nonghikai SSA ka West Khasi Hills ban siew noh ia ka bai trei ne ka tulop jongki naduh u bnai Naiwieng, bad Nohprah, 2015.
Ha ka kyrwoh ba la pynlait, u Bah Hamar Lyngkhoi u secretary ka HANM West Khasi Hills, u la ong ba ka seng ka sngew lyngngoh ia ka jingleh bein ka sorkar ia ki nonghikai skul ban khlem siew tulop la bun bnai kaba dei ka hok jongki.
U la ong ba ki ophisar sorkar kiba long heh long hain ki dei na ka kti bad ka jabieng jong ki nonghikai bad ki dei ban sngewthuh ba ban niew burom ia ki nonghikai.
“Lada ka sorkar kam ai noh ia ki jingdawa jongki, ka seng kan iai don ryngkat bad ki, ha kano kano ka jingiakhih ne ka lynti ba kin sa shim ha kine ki ban wan”, la ong u Bah Lyngkhoi.