Kyrshan ka CoMSO, ia ka jing ialang paidbah U bah Ardent

Shillong: Na ka liang jong ka CoMSO da kawei ka jingmut ka sngewdei ba ka la don kam ia ka Jaidbynriew Hynniewtrep, ban ia tylli kawei ha ka ban pyrshah ia ka citizenship amendment Act ,2019 bad ban dawa pyntreikam noh ia ka ILP ha ka Jylla. Kum ka dak bad ka thrang ia ka jing iatylli kawei ban pyrshah ia ka CAA bad ban dawa ILP, la rai ba ka COMSO kan leit ia don bynta ryngkat lang ha ka jingialang ka ban long lashai ka sngi (6.02.2020) ha madan student, Jaiaw kaba la khot da u Bah Ardent Basaiawmoit.

“Ngi kyntu ia ki dkhot jong ki Seng bapher hapoh ka CoMSO bad kumjuh ruh ia ki paidbah ka Bri u Hynniewtrep ba phin ia leit ryngkat lang da ka Jing shitrhem ha madan student ban pynpaw shai ba ngi kum ka Jaidbynriew Hynniewtrep ngi pyrshah ia ka CAA bad ngi dawa ba ka sorkar India kan kubur noh ia ka ILP ha ka Jylla Meghalaya” ong ka kyrwoh na u bah Robertjune Kharjahrin, Chairman ka CoMSO.

Ka CoMSO ka la rai ruh ba pynsangeh ia ka evening sit in demonstration ha ka 6.02.2020 namar kum ka kynhun kan leit ia don bynta lang noh ha madan student. Ha ka 7 bad 8 tarik pat ka evening sit in demonstration kan iaid beit kumba la pynbeit.