Kyrshan ka BJP Meghalaya ia ka ILP bad pyllait ia ka CAA

Shillong: Ka BJP Meghalaya ka kyrshan tyngeh ia ka rai ka sorkar jylla lyngba ka ïing dorbar ka jylla ban pyntreikam da ka Inner Line Permit (ILP) ne Bengal Eastern Frontier Regulation 1873 bad ban pyllait pura ia ka Citizenship Amendment Act (CAA) 2019.

     Haba kren myn hynnin ka sngi u president ka BJP Meghalaya bah Shibun Lyngdoh ula ong ba ka party ka ai jingkyrshan kaba pura ia ka rai ka sorkar jylla ban pyntreikam da ka ILP bad ban pyllait pura ia ka CAA.  
    “Ngi ai jingkyrshan ia ka rai ka sorkar jylla halor ka ILP bad ka CAA”, la ong u bah Shibun.
     Ula ong ba ki nongialam ka party kin leit iakynduh ia ki heh nongialam sha Delhi hadien ba la dep jied ia ki nongkitkam thymmai kaba lah ban long hadien une u bnai. 
   Lah ban kdew ba dang shen, u bah Sanbor Shullai u la ong ba un leit kynduh ia u Amit Shah u myntri kam pohiing ka ri bad u Narendra Modi u myntri rangbahduh ka ri bad kiwei ki  nongialam ka BJP ban pynsngew bad kyrshan ia ka rai ka ïing dorbar thaw ain ban pyntreikam da ka ILP bad ban pyllait pura ia ka CAA ha ka jylla Meghalaya. 
    La iathuh ba ki ar ngut ki MLA ka BJP kata u bah Sanbor Shullai bad u bah AL Hek kin leit kynduh bad ka MDA bad kin leit kynduh ruh kum ki briew ka party ia ki nongialam ka BJP.