Kyrshan jingialang ILP ka MPHRC

Shillong, 29 Naiwieng:
Ka Meghalaya People’s Human Rights Council (MPHRC) ka la kyr shan ia ka rally jong ki sengbhalang ban dawa pyntreikam ia ka ILP ha kane ka jylla.
Ha ka jingpynlait khubor, u Information secretary ka seng, u Bah Pynskhem Syiemlieh u laong ba ka seng ka la shim ia ka rai ban kyrshan pura ia ka rally jong ki 13 seng bhalang ban long lashai ka sngi ha madan Students, Jaiaw.
“Ka MPHRC ka kyntu ia baroh ki paidbah ban wan iashim bynta ha ka rally ba ki dei ban bat ia la ka akor ka burom khnang ba ka rally kan long kaba jop bad kaba seisoh khnang ban lait na kino kino ki jingjia ba sngewsih kiba lah ban mih”, la ong u Bah Pynskhem.
Ka seng ka kyntu ruh ia ki bor synshar ka district bad ki pulit ban burom ia ka sur jong u paidbah bad ia ka hok longbriew manbriew bad ban peitngor khamtam eh ia ki riew shim kabu kiba lah ban pynthoh bria bad pynjah burom ia ka jingthmu babha jong ki sengbhalang ha kane ka rally, la pynkut ka kyrwoh na ka seng.