Kyrshan ILP ka RBYDSO

Shillong, 6 Nailur:
Ka Ri Bhoi Youth Development and Social Organisation (RBYDSO ) ka la kyrshan ia ka jingdawa jong ki sengbhalang ban pyntreikam noh ia ka Inner Line Permiet (ILP) ha kane ka jylla.
Ha ka kyrwoh ba la pynlait da u President, samla Dibishon Malai ka seng ka la pynrem jur halor ka jingleh mynthi u Myntri Rangbah ka jylla, u Dr Mukul Sangma ia ka jingdawa ki sengbhalang ban pyntreikam noh ia ka Inner Line Permit (ILP) ha ka Jylla Meghalaya.
“Ia ka ILP la donkam ban pyntreikam hapoh kane ka jylla, na bynta ban iada ia ka jaidbynriew rit paid na ka jingwan tyllep kiwei pat ki jaidbynriew heh paid na kiwei ki jylla,” ula ong bad pynpaw ia ka jingbitar ba ka jingsngap mynthi jongu Mukul ka pyni ba umsalia ban iada ia ka jylla kaba don mynta ha tmier ka jingma na ka jingwan tuid ki bar jylla.
Ka RBYDSO ka kyrshan pura ia ka jingiakhih pakhang surok miet jong ki sengbhalang ka jylla, na bynta ban dawa na ka sorkar ban pyntreikam noh ia ka ILP ha Meghalaya.