Kyrshan ia U Conrad, hukum ka BJP na Delhi

Shillong 26 Iaiong:
Ka jingthmu ka BJP Meghalaya ban sei kyrtong na ka bynta ka elekshon MP shiteng samoi na Tura sha ka Lok Sabha ha kane ka kynti, ka la pulom noh hadien ba ka seng kmie na Delhi ka la hukum ba dei ban shu kyrshan beit ia u kyrtong ka NPP u Conrad K Sangma.
“Ngi dei kiba kohnguh sneng bad long ryntih, ngi kohnguh beit ia ka hukum ka seng kmie na Delhi”, la ong u President ka BJP Meghalaya u Bah Shibun Lyngdoh haba pynbna ia kane ka rai ka party BJP na Delhi.
“Ka High Command ka party kam kwah ban sei kyrtong ha kane ka elekshon MP shiteng samoi na Tura, hynrei ngin kyrshan noh ia u kyrtong ka NPP ha kane ka kynti”, la ong biang u President ka BJP.
Ha kajuh ka por, u Bah Shibun u la kubur ba ka long kaba shisha ba ka seng na kane ka jylla, ka la dep phah ia ki kyrteng jong lai ngut ki briew kiba kwah ban iakhun ia ka elekshon shiteng samoi ha kane ka  kynti. Hynrei um shym la kwah ban pynpaw kyrteng mano na kita ba kwah ban iakhun ia ka elekshon shiteng samoi na Tura.
“Hooid, ngi la dep phah lai ngut ki kyrteng sha ka High Command ba kan shim ia ka rai iano ban ai tiket hynrei hynne ka janmiet, ka la phah khubor sha ngi ba dei ban nym pynieng kyrtong ha kane ka kynti hynrei dei ban shu kyrshan beit ia u kyrtong ka NPP”, la ong u Bah Shibun.
Mynta ka party ka la pynkhreh ban leit ialap elekshon ban ai ia ka jingkyrshan ia u kyrtong ka NPP ban ioh ia ka jingjop.
U President ka BJP u la kren jam pat da kaba ong ba ha ka elekshon 2018, ka party kan sei kyrtong lut ha baroh 24 tylli ki MLA konstitwensi ha Garo Hills kynthup ha Khasi bad Jaintia Hills.
“Ha u snem 2018, ngin sei kyrtong lut ha baroh ki 24 tylli ki konstitwensi ha Garo Hills bad mynta ngi dang pynkhreh ban leit sha man ki jaka ban pynroi ban pyniar ia ka party BJP”, la ong u Bah Shibun.
U la kyntait ba kan don kano kano ka jingsngew diaw ne ka jingiapait halor ka jinghukum ka High Command ban nym pynieng elekshon ha kane ka kynti na Tura bad ong, “Ka lah ban don ka jingsngew na ki briew ka party hynrei ngin sa pynbeit lada don kum kata”.
Lah ban kdew ba dang shen, ka BJP na Garo Hills ka la rai ba kan sei kyrtong ha kane ka elekshon shiteng samoi hynrei da kane ka rai ka high command, ka jingthmu jongki ka la kut noh syndon.