Kyrpad U MLA na ka sorkar, ban pynduna noh ia ki jing pyrkhing hapoh iingmane

Shillong: U MLA jong ka Mawlai Konstitwensi, U Bah Process Sawkmie u la kyrpad ia u Myntri Rangbah ka Jylla bad ia u Symbud Myntri Rangbah ka Jylla ba kin pyrkhat ban pyllait noh ia ka jingshakri ha ki iingmane lane ki jaka shakri Blei hadien ba la iohi ba ki iew ki hat, ki cinema hall, ki paidbah bad wat ki kali ruh ki la ioh ia ka hukum ba ki la lah ban thep briew kumba ki ju thep baroh shi katta bad ka bai kali biang kumba ju long.

Wat la ka Sorkar ka la shah ia ki iingmane ba kin plie noh bad shakri, hynrei ki kyndon ba dei ban bud ki dang teh beit.

Kumba ka long mynta ki iingmane baroh ki dang hap ban buh la ka por ka por, na ka bynta kawei pa kawei ka dong bad kim ioh shuh ban ia don lang baroh na ki dong ha kajuh ka por kumba long mynshwa. Kumta na ka liang u Bah PT Sawkmie, u la kyrpad ia ka sorkar ba kan shah noh ia ki paid riew ngeit ba kin ia don lang ha kajuh ka por ban ia shakri lang, ym ban don la ka jong ka jong ka por bad ka jingiajan kan long beit kum ba long baroh shirta.