Kyrpad U MLA, ia ki kynhun kiba kwah leit jurip sha khappud Assam

Shillong: U MLA ka Umroi constituency u bah George B lyngdoh, u la buh ka jingkyrpad ia ong ba ia ki kynhun sengbhalang, ki riew shimet lane ki nongmihkhmat kiba don iaka jingthmu ban leit ai mynsiem ia ki paradoh parasnam kiba shong ba sah sha ki bynta khappud, kan bha ba kin ia kynduh lane pyntip shwa sha ki bor pyniaid district khnang ban lah ban sngewthuh iaka jinglong jingman sha kitei thain khappud ki ba don ka jing ia kajia.

Haba kren bad ki lad pathai khubor na ka liang u bah Lyngdoh, u la ong ba khnang ba ka jing leit jngoh ban ai mynsiem jong kino kino ki kynhun kan nym long kaba pyn tharai sniew ia kiwei pat ki jait bynriew kiba sah lang ha katei ka thain bad khnang ba ki para doh para snam khasi kiba ha katei ka thain kin lait na kano kano kano ka jing shong syier lane shah thom bor ki dei ban pyntip shuwa ia ki bor District.

U bah George u la ong ba ha ka ba ia dei bad ka mat ia kajia ha khappud ka jingsngewsynei bad ka jingnoh mynsiem ka don ym tang ha ki nongmihkhmat hynrei kane ka khamtam ha ki paidbah hi .hynrei wat la na ka liang ki Sengbha lang ki don ka jingsngew da ka jingthmu ban leit ban ai mynsiem bad ban leit ban peit hi da la ki jong ki khmat ia ki jingeh jong ki nongshong shnong ha kine ki thain.

Ula ong “Kaei ka ba la jia ha kine ki sngi ba la dep ka long namar ba ha khappud hi ym tang ki jait bynriew jong ngi ki ba sah hynrei ki lasah bun jait bynriew bad ka jingleit jong ki sengbahlang ka paw pynban kum ka jingpyni bor namar ba ka dang dei ka jaka ba dang ia kajia ki wei pat ki jait bynriew ki sngew ba la da ki wan kham bun ki briew nangne ki wei ki jait bynriew ruh ki kwah ban pyni la ka jong ka bor kane ka wan rah ia ka khubor ba ha ka jaka ba ngin leit da ka jingsngewlem hynrei kam mih ka jingkynad bad ka jing sngewthuh bakla”.

U la ong ruh ba ki ba bun hi ki sengbhalang ki dei ki khun samla ki ba dang khie dang san ha kaba kim pat lah ban sngewthuh ia ka daw ka jingmih ka jingiakajia khappud, kaei ka jingeh jong ki bad bun na ki, ki kwah ban tip kaei kadaw ba ki mad jingeh kine ki briew ha ka ne ka thain. U bah Lyngdoh u la buh ka jingkyrpad ba kum ki nongshong shnong ha ka Ri ki dei ban ia pyrkhat lang na ka bynta ki jaitbynriew, kiba don ha kine ki thain ba yn da kine ki la wan phai kaei ka ban jia ia kine kiba don ha ki thain khappud.

Kumta u la ai jingmut ba lada kino kino ki kynhun sengbhalang, ki riewshimet lane ki nongmihkhmat kiba don ia ka jingtnmu ban leit ai mynsiem ia ki paradoh parasnam kiba shong ba sah shaki bynta khappud, kan bha ba kin ia kynduh lane pyntip shwa shaki bor pyniaid district khnang ban lah ban sngewthuh iaka rukom long shakitei thain bad kane ka jing leit jngoh ban ai mynsiem kan nym wan rah ia ka no kano ka jingia kynad ha kine ki thain.