Kyrpad ki Syiem sha KHADC

Shillong,3 Naiwieng:
Ka Dorbar Ki Khlieh Nongsynshar Ka Ri Hynniew trep, ka kyrpad jur ia ki bor KHADC ba kin pynsangeh noh shuwa ia ka Village Administration bill 2013 khnang ban ailad shwa ia ki Khlieh nongsynshar ba kin pyrkhat sani bha halor ka ain/bill kaba la tyrwa bad kaba ki 30 ngut ki MDC kin shim ia ka rai lashai ka sngi ka 4 tarik u Naiwieng.
Ha ka jingshisha ki Hima Khasi ki la kyntu jur ia ki bor KHADC ba kin pynsted shwa ia ki Ain ki rule na ka bynta baroh ki 54 Hima /Elaka. Haduh kine ki sngi ki bor KHADC na ki 54 Hima/Elaka 12 tylli ki act bad 2 tylli ki Rule la dep shna na ka bynta ki ar tylli ki Hima ka Hima Nongstoin bad Hima Maharam. Kine ki ar Hima Khasi States ki la don ruh ki Ain Shnong kiba bniah. Katba na ki 29 Elaka Sirdarship – La dep 7 tylli ki Act bad ha kine baroh 29 Elaka Sirdarship ngim pat dep thaw ia ki Rule haduh kine ki sngi. Ki Ain Shnong ki pher na kawei ka Hima sha kawei ka Hima, dei halor katei ka nongrim ba ka Dorbar Ki Khlieh nongsynshar ki la kyrpad ban pynsangeh noh shuwa.