Shillong: Ka UDP Ranikor ka kwah ba u Bah Pynshngain N Syiem na ka PDF, uba thmu ban iakhun iaka elekshon shiteng samoi na Ranikor, u dei ban shu kyrshan ia u kyrtong ka UDP ha kane ka kynti.
Ha ka jingiakren bad u Rupang, u nongialam ka UDP na Ranikor konstitwensi u Bah Pius Marwein, u la ong ba kumba long mynta ka UDP ka la iaid shaid shaid ban pynkhreh na ka bynta ka elekshon shiteng samoi ban sa long shen na Ranikor.
“Ngi buh ka jingkyrpad ia u Bah Pynshngain ba un don ka mynsiem rangbah, ban shu kyrshan ia ka UDP ha kane ka elekshon”, la ong u Bah Pius uba long ruh u kyrtong ka UDP haka elekshon ba la dep.
U Bah Pius u la kubur ba ka UDP Ranikor ka sngew iahap ia ka jingkren jong u President ka UDP u Dr Donkupar Roy, ba u Bah Pynshngain un wan ban ai jingkyrshan lang ia ka UDP ha kane ka elekshon bad ia kaban sa wan, yn sa pyrkhat pat.
“Ngi la iaid beit ban pynkhreh ia ka elekshon, ka UDP ka la wan baar ha kane ka elekshon ba la dep bad kin don ruh kiwei kiban wan kyrshan”, la ong u Bah Pius.
Halor ka jingkylli ba don ki shnong na thain Mawsynram kiba hap sha Ranikor ha ka MLA, u Bah Pius u la ong, “Ki don kumba 5 tylli eiei ki shnong kiba hap ha Mawsynram ha ka MDC, hynrei ha ka MLA konstitwensi ki hap sha Ranikor. Kine ki shnong ki dei ki ktem ba khlain jong ka UDP”.
U la iathuh ruh ba ki nongialam ka UDP sengkmie, kim pat khot na ka bynta ban iakynduh hapdeng jongu bad u Bah Pynshngain ban iapynbeit ia kane ka kam.
“Nga dang ap na ki nongialam seng kmie ban khot ia ka jingiakynduh kumba la rai ha ka jingialang ba la dep”, la ong u bah Pius.
Ha kawei ka liang, u la pyntip ba ka UDP Ranikor circle kan pdiang ia ki nongkyrshan ka NPP ha ka por u Bah Donkupar Massar bad kumjuh ki nongkyrshan ka BJP ha ka 18 tarik mynta u bnai ha Nongnah.
“Ngin pdiang sngewbha ia ki nongkyrshan ka NPP jong u Bah Donkupar Massar bad jong ka BJP ha ka 18 tarik Naitung ha Nongnah”, la ong u Bah Pius.
U la ong ba ka NPP jong u Bah Donkupar Massar ha ka elekshon ba la dep, ki don kumba 3 hajar katba ki nongkyrshan ka BJP ki don 18 spah eiei.