Kyrpad ka MGLPCSTA, ban pynlong biang ia ka eksamin kyrpang ki nonghikai

Shillong: Ka Meghalaya Government Lower Primary Contract School Teachers Association” (MGLPCSTA) ki kynhun jong ki nonghikai skul kontrak bases ha ki skul sorkar mynta ka sngi ki la wan ban pynpaw sha ka sorkar jylla ba kan pyrkhat lem na ka bynta ki nonghikai kiba khlem lah ban pass ia ka eksamin MTET kaba la pynlong ha u bnai Kyllalyngkot jong u snem 2019 ha kaba ia ka result la pynmih ha ka sngi ba ar mynta u bnai bad tang 10% kiba pass ia kane ka eksam.

Haba ia kren bad ki lad pathai khubor mynta ka sngi ha Shillong Press Club u Vice President ka seng u bah Shinning Kharsyntiew, u la iathuh ba ka jingpynlong ia ka MTET eksam ka long ban thung noh ai ki nonghikai ki ba pura ha ki LP School sorkar bad 1200 ngut ki nonghikai kontrak, ki la ia khun ia kane ka eksamin, hynrei bun na ki kim shym la lah ban pass ia kane ka eksam kumba ka la paw ha ka result kaba la pynmih ha ka 25 tarik mynta u bnai.

Ka jingpynpaw jong kine ki nonghikai kiba khlem pass ia ka MTET ka long aiu kan jia ia ki namar ba ban wad kam shawei ruh ka rta jong ki ka la palat.

Na ka liang ki nonghikai kontrak ki buh ia ka jingkyrpad ha khmat jong ka sorkar ban wad ka lad ka lynti na ka bynta kito kiba khlem pass ia ka eksam MTET ba kin lah ban pyndap ia ka iing ka sem.

U bah Kharsyntiew u la iathuh ruh ba bun na ki nonghikai kontrak ha ki skul sorkar, kila trei palat ia ka khyndai snem, ha kine ki khyndai snem ia ka jingtreikam jong ki la juh ai man ka 59 sngi bad ha dien ka 59 sngi ki ioh ia ka jingpynthymmai biang,

U la iathuh ruh ba ki nonghikai ki la pyndep ruh ia ka Dl.eT katkum ka jingpynbeit jong ka sorkar, hynrei na liang ka sorkar ka la pynmih ia kane ka MTET ha kaba bun ki nonghikai kim shym pass ia kane.

Na ka liang jong ka Kong A Suchiang General Secretary ka seng ka buh ia ka jingkyrpad ha khmat jong ka sorkar ba lada ka long kaba lah ban sngewbha ban pynlong ia ka eksam kaba kyrpang sa shisien na ka bynta jong ki ba kin ioh biang ia ka kam,

Haduh mynta na ka liang ka sorkar ka la pynjlan ia ki kam jong ki kaba long tang 59 sngi da la kut kane ka por kim tip shuh kaei ka jia ia ki kumta ki kyrpad ia ka sorkar ba pyrkhat lem na ka bynta jong ki.