Nongpoh: Ka Deputy Commissioner & Chairperson DDMA, Ri Bhoi District, Nongpoh, ka la kyrpad ia ki Rangbah shnong/Nongialam Shnong/SHGs/Pastor, Tymmen Basan, Phadar ba kin sngewbha ban shimkhia lem ha ka ban peit ba baroh ki briew kiba wan rung sha ka district ne jylla kin hap ban pynrung kyrteng ha kane ka websitewww.meghalayaonline.gov.in/covid.
La pynshai ruh ba na bynta jong kito ki bym don internet kin phone ha ki number 81320-11037, 84330-38716, 97115-44148, 73385-50288 naduh ka 9 AM haduh 8 PM. Hadien ka jingpynrung kyrteng, ki nong apply kin ioh ia ka Acknowledgement receipt bad u QR Code ban phah online ne yn phah sha u mobile number da ka whatsapp/SMS. Ia une u QR Code dei ban pyni ha ka por ba rung ha Entry Point kaba don ha Byrnihat ryngkat bad ka ID ba don dur.
Lada don ki bym lah ban pynrung kyrteng online, ki lah ban pynrung kyrteng lyngba ka form ba la buh ha Entry Point, hynrei lada lap ia ki briew kiba wan nabar ki wan rung ha ka jylla khlem da pynrung kyrteng kin shah pynshitom katkum ka ain.
Baroh ki briew kiba wanrung hapoh ka jylla kin download ia ka ‘Corontine App’ jong ka sorkar lyngba ka url: https://bit.ly/35gg1cm lane da ka Google Play Store, ki dei ruh ban download ia ka App jong ka sorkar pdeng ka Aarogya Setu App. Tang shu poi ha shnong, kita ki briew ba wan nabar kin pyntip sha u Rangbah Shnong bad ka shnong kan pynthikna ba kin nym mih na la iing bad na ki kamra haduh 14 sngi lynter ryngkat bad ka iing ka sem hi baroh kawei bad sa 14 sngi (Self Quarantine) kaba mut ba dei ban phikir bad ujor lada don ki dak ki shin jong ka jingbaiong-khlieh, jyrhoh bad jingeh/jingwit ha ka jingring bad pynhiar mynsiem, ki dei ban phun mar mar sha ki number – 8787520449 ne 108.
Lada kito ki briew kiba don ha ka Quarantine ne ha ki iing lajong ne ha ki centre ki pynkhein, kin shah pynshitom katkum ka ain. Ki Rangbah Shnong/Dong ki dei ban peit bha ba yn ym don mano mano ba kren bein ne niew bein ia ki. Ki Rangbah Shnong, Rangbah Dong ki long ki nongmihkhmat bad ki rishot jong ki shnong ki thaw, namarkata dei ma ki, ki ban pynshlur ia ki nongshongshnong ha ka jingiakhun ia u COVID-19. Ka long kaba donkam ba ki Rangbah Shnong/Rangbah Dong kin ia snoh kti lang bad iatreilang bad ka sorkar jylla ha kane ka por ban iada na ka khlam COVID-19.
Ki Rangbah Shnong/Rangbah Dong ki dei ban khmih bha ba ym dei ban don kano kano ka longiing ban shah thngan tang na ka daw ka jingiapher niam ne jaitbynriew. Lada don ki longiing kiba ngat ha ka jingthngan/jingkyrduh dei ban pyntip bak bak sha u Block Development Officer ban leh ia kaba donkam.
Ki Rangbah Shnong ki dei ban pynthikna ia ka rukom pahara ba ym dei ban ieng/shong jan palat hynrei ka jingiajngai iwei na iwei pat ka dei ban long shi mitar ha ka por ba leit thied jingban/tiar na dukan. Ki lai tylli ki kyndon ba donkam ban bud ki long, ban sait ia la ki kti da ka sabon, tap ia la ka shyntur haba jyrhoh ne shynriah, ban pyndonkam ia ki mask bad ban ieng/shong kham jngai iwei na iwei pat la kumno kumno 1 mitar.
Pyndonkam da ki tynghung pyrta shnong na ka bynta ki khubor kyrkieh kiba iadei bad kane ka khlam COVID-19. Dei ban peit bha ba dei ban don ka jingkhuid jingsuba ha shnong ha thaw bad ban pyrkhing ia ki nongshong shnong ba kin ym biah pathar kat sha ba lap. La mana ba ym shah ban ia rung ia mih na kawei ka iing sha kawei pat khlem da don ki daw kiba kyrkieh ne bym lah lait.
Ban iarap ban pynpoi ka bam ka dih, ka um bad kiwei kiwei ki jingdonkam jong kano kano ka longing kaba hap leh Quarantine. Ba kan ym don kano kano ka jingpynwit ha ka leit ka wan jong ki nongtrei sorkar khnang ban lah ban pyndep hok ia ka kamram jong ki. Kumjuh ruh ban ym don kano kano ka jingbishar ne jingtieng khamtam ia ki Nongtrei ha ka tnat ka Koit ka Khiah, kiba kloi ban mih shaphrang ban iada ia ngi ki riew paidbah. Ban nym pynwit ia ka iaid ka ieng jong ki nongshong shnong da kaba ker ia ki lynti da ki maw ne ki dieng ki siej namar kane ka buh jingeh khamtam ban rung kali ha la ki shnong.
La khein beain ban buh Checkgate. Ha kaba iadei bad ki nongap shnong kin sngewbha ban nym ktah ia ki kot ki sla jong ki nongiaid lynti hynrei ki dei ban shu jngoh/peit na jngai. Lada don kano kano ka jingiap na kane ka khlam, dei ban iarap bad kitkhia ban pyndep ia ka jingtep ne jingthang lem bad ki nongpyniaid sorkar, ki pulit, ki nongpyniaid Balang khlem da don kano kano ka jingpynwit.
Phi don ban ong eiei?