Kyrpad ka AMSSATA, RB ban pynsangeh rali

Nongpoh, 18 Nohprah:
Ka Synjuk jong ki Nonghikai hapoh jong ka lama All Meghalaya Sarva Shiksha Abhiyan School Teachers Association (AMSSAATA), ki la kyrpad ia ki nongialam jong ka AMSSASTA Sengkmie ba kin pyn sangeh noh shwa ia ka jingiaid paidbah (rally) kaba ki la buh ban pynlong ha ka 21 tarik mynta u snem, ban dawa na ka sorkar ba kan siew noh ia ka bainong ne ka tulop kaba la bun bun bnai.Katkum ka kyrwoh ba la phah da u Secretary ka AMSSATA, Ri Bhoi District, Bah L. Marngar, u la iathuh, ba na ka liang jong ka synjuk, hadien ka jingleit iakynduh ia u State Project Director (SPD) ha ka 16 tarik mynta u bnai, u la iathuh, ba ka sorkar jylla kaba la thmu ban pynlait ia ka tulop kaba shibnai kata jong u bnai Nailar, hynrei hadien ka jingiakynduh jong ki nongialam ka Unit na Ri Bhoi district u la kular ruh wat ban pynlait ia ka tulop jong ki ar bnai kata u bnai nailur bad Risaw, ha shwa ban rakhe ia ka Kristmas mynta u snem.Kumta na ka liang ki nongialam jong ka AMSSATA, RB, ka la kyrpad ia baroh ki Nonghikai SSA jong ki distrik bapher bapher hapoh jong ka jylla Meghalaya, ba kin ia pynsangeh shwa ia kane ka rally kaba la pynbeit ban long ha ka 21, hynrei lada ka sorkar kan dang pynslem ia ka tulop ba dangsah, kin sa pyrkhat da kum wei pat bad ba kin ai ka jingkyrshan bapura ia ka AMSSATA, sengkmie lada don kino kino ki jingiakhih pyrshah ia ka sorkar wat ha kaba iamih paidbah. Kum ka synjuk ka buh ruh ia ka jingkyrpad ia ka sorkar bad ia ki heh jong ka distrik ba kin ialeh shitom ha ka ban siew dep noh ia ka hok jong ki nonghikai kiba ai ka jingshakri met bad mynsiem khamtam eh ban kyntiew ia ka jingnang jingstad ha ka jylla hi baroh kawei. Shuh shuh ruh, na ka liang ka AMSSASTA, Ri Bhoi District, ka ai khublei Kristmass kaba suk kaba kmen bad kaba wanrah ia ka jingsuk jingkmen bad ka jingkoit jingkhiah ia baroh ki nonghikai jong ka district bad ruh jong ki district bapher bapher hapoh ka jylla.