Kyrpad ia ka sorkar ban thungkam noh ia kiba la pass MTET

Shillong:Na ka liang jong ki nonghikai kiba la pass ia ka eksam MTET, myn hynnin ka sngi ki la kyrpad ia ka sorkar ban pynsted noh ia ka jing thungkam ia ki nong hikai ha kylleng ki skul sorkar kiba don ha ka jylla.

Na ka liang u Bah Badapjied Kylla, Convener MTET Qualified Teacher, u la iathuh ba ha ki advertisement ba ladep pyllait shen la pyntip ba ia ka tarik ba khatduh ban pynpoi ia ki form ka long ha ka 10 tarik u July 2020 bad yn sa pynmih ia ki kyrteng ha ka rejected list ha ka 6 tarik u bnai Jymmang 2020, hynrei naka daw ka jingwan noh une u khñiang jingpang coronavirus, ka sorkar ka la pynbna ban yn sa rah noh ia ka tarik ban pynmih ia ki kyrteng bad ban pynbna ia ka tarik ban pynlong ia ka interview. Hynrei haduh mynta lai bnai eiei, ka sorkar kam pat leh eiei halor kane.

U la iathuh ba na ka liang jong baroh kiba iakhun ia ka eksam ki la kyrpad ia ka sorkar ba kin leh eiei halor kane ban pnlong noh ia ka interview bad ban thungnoh ia ki nonghikai kiba pura ha ki skul sorkar khnang ba ma ki kum ki nonghikai kiba ladep shah pyntbit bad kiba la pass bha ha ka D.El.Ed bad kiba pass ha ka NIOS exam kin lah ban ai jinghikai bad ban ai jingshakri ia ki khynnah skul ha kum kine ki por ba mynta. U la iathuh ba ia ka MTET certificate jong ki ka long tang ar snem bad ia ka certificate jong ki la ai da ka DRP naduh ka 10 tarik u June.

Ha kajuh ka por u la iathuh ba bun na kiba la pass ki la tam ka snem namar ka snem jong ki ban hikai ka long tang haduh 32 snem na ka bynta ki General bad 37 snem na ka bynta ki SC/ST.

U la iathuh ba ia ka jingthep kyrteng bad ia ki tarik bakhatduh la buh hi hapoh ka jingpyniaid da ki SDO bapher bapher ha ki district katba ha Shillong ka sngi khatduh ban pynpoi ia ka form ka long 10 tarik u July. Haduh 156 tylli ki don ki post ba lait tang ha shillong bad 15 tylli hapoh ka Upper Primary.

U la iathuh ba na ka liang jong ki kila leit ban aiti ia ka shithi sha u myntri badei peit ia ka pule puthi ban peit bniah noh halor kane ka kam. Baroh kiba la pass ia ka MTET ki la don hduh 4470 ngut laba khein lang bad Upper Primary bad Lower Primary.

U bah Sylvester Mawthoh uba dei u nongaiktien, u la kyrpad ia ka sorkar ba kadei ban pynlong noh kloi ia ka interview ha ki post kiba lait khnang bad ki nonghikai kiba la pass ha ki kyrdan bapher bapher ki lah ban hikai noh namar ba ki post ki bun kiba thylli bad kum ha kane ka por ba ki khynnah ki donkam ia ka jinghikai ki lah ban ioh watla ym dei na ka online class ruh.