Kyrpad ban kyrshan ia u Micheal

Shillong, 05 Jylliew:
Ka Seng Kynthei Laitkor Nongdaneng bad Seng Samla Shnong Laitkor Nongdaneng  kitbok kitrwiang lem ia u Samla Micheal Rajee Syiemiong  ba un lah shisha ban poi shaduh ka kyrdan jong ka jingjop ha kane ka jingleit iashim bynta ka jong u ha Mega Audition jong ka Rynsan iakop Shad kaba heh tam ha ka Ri, ka Dance India Dance bad mynta u don ha Mumbai.
Kitei ki seng ki buh ruh ka jingkyrpad ia ki paradoh parasnam ba kin ai ka jingkyrshan lem ia une u samla khnang ba un ioh rung sa sha ka wat ba khathynriew (round-16) ka ban long ha ka 10 tarik mynta u bnai 2015, khnang ba un ioh ban poi shaduh ka Thong jong ka Nam bad ka Burom lyngba ka jingialam bad btin lynti lem da I kmie bad Kpa jong u na lyndet bad U Blei un long u nongiarap ba khlain bor tam jong u.
 U Samla Micheal Rajee Syiemiong, ba na ka Shnong Laitkor bad uba long u khynnah khun swet u bym don kmie don kpa shuh, hynrei lyngba ki sap ki phong kiba U Blei ula ai ha u bad lyngba ka jingtrei shitom ka jong u, u la lah ban poi shaduh ka Mega Audition jong ka Rynsan iakop Shad kaba heh tam ha ka Ri, ka Dance India Dance bad mynta u don ha Mumbai. Na ka liang jong kiba ha iing ha sem lyngba kane ka kyrwoh ki la iathuh shuh shuh ba kane ka jinglah ka jong u ban poi shaduh katei ka kyrdan ka la wanrah ia ka nam ka burom ym tang ia ka Shnong hynrei ia ka jylla hi baroh kawei.