Kyrmen ki Rangbah Shnong ban ioh VAB shwa u Snem Thymmai

Shillong, 22 Nohprah:
Ki Rangbah Shnong hapoh ka lama ka Synjuk ki Nongsynshar Shnong ka Bri u Hyn niewtrep (SNSBH)  ki la sngew lynga bad dum buit mynta namar ba kim pat sngew thikna lano kin ioh ia ka Village Administration Bill (VAB) kaba ki la pynkhih pyrthei ha ki bnai ba la dep ban dawa pynurlong ain noh ia ka.
Haba iakren mynta ka sngi bad u chairman ka SNSBH u Dr Werlok Kharshiing u la ong ba haduh mynta ki rangbah shnong ki la sah ha ka umdum umngit namar ba kim pat ioh jingtip kim pat ioh khubor eiei halor kane.
“Ngim pat tip eiei, ym ioh jingtip haduh mynta”, la ong u Dr Kharshiing.
Hynrei watla ym pat ioh jingtip eiei halor kane, na ka liang u Dr Kharshiing u la ong ba ka Synjuk ka kyrmen ba la kumno kumno ka sorkar pdeng ka lah ban phah ia ka VAB ha shwa ban kut jong une u snem sha u Lat ka jylla ba un ai ia ka jingmynjur.
“Ngi kyrmen ba shwa ban kut une u bnai, ka sorkar pdeng lyngba ka tnad kam pohiing kan sa pynphai ia ka VAB sha u Lat ka jylla”, la ong u chairman ka SNSBH.
U la ong ba ka jingbuh por ia ka sorkar jylla ba kan pynurlong shi bnai ia ka VAB ka la long da kumwei pat hadien ba ki Rangbah Shnong ki la sngew ba lada kim leit iakynduh sha Delhi ia ki heh ka sorkar
pdeng, kan nym poi shaei shaei ruh.
“Ngi sngewthuh ba khlem leit Delhi ban kynduh ia ki heh sorkar pdeng kan nym poi shaei sha ka thong. Ngi la iakynduh ia ki heh sorkar pdeng ha Delhi bad ngi la ioh ia ki jingkular ban pynsted hynrei ka jingpynslem ka dei ba leit don noh ka dorbar parliament”, la ong u Dr Kharshiing.
Lah ban kdew ba ka SNSBH ka la iakynduh ruh ia u myntri kam pohiing ka ri u Rajnat Singh, ia u secretary ka tnad kam pohiing ba peit ia ka thain mihngi ka India ban kyntu ia ki ban pynsted ban ai noh ia ka jingmynjur ia ka VAB kaba la donkam kyrkieh ban pynkup bor ia ki rangbah shnong ka ri Khasi bad Jaintia.