Kyrmen ki nongdie doh masi ban urlong jingdawa

Shillong, 13 Lber:
Ka seng ki nong die doh masi ka Khasi Jaintia Butchers Welfare Association (KJBWA) ka la kyrmen ba ka sorkar hapoh ka jingialam jong u Myntri Rangbah ka jylla u Dr Mukul Sangma ba kan pynurlong ia ka jingdawa ka seng ban ai ban pyniaid ia ka Transit Pass ha ka jingthied masi kumba la ju leh naduh u snem 1993.
Ka seng ka la iaroh ruh ia u MLA ka Nongkrem u Bah Ardent M Basaiamoit uba la rah ia kane ka mat ha ka iing dorbar thawain ha kine ki sngi. Ha ka jingpynlait kyrwoh,  ka KJBWA ka sngew kmen bad ka ai jingiaroh ia ka jingkren lem jong u Bah Ardent halor kane ka kam kaba ki nongotdoh ki la iakhih ha kine ki sngi hadien ba la jur palat ka jingiakhi ia tuh ia ki masi sha Bangladesh, kaba la buh jingeh ia ki nongkhaii masi bad nongotdoh ha kane ka jylla.
“Da ka jingmaitphang jong une u rangbah kum u nongialam ka HSPDP, la kyrmen ba ka sorkar jylla kan peit kloi noh ia ka dorkhas ba la phah da ka seng”, la ong u general secretary ka seng Bah Generous Warlarpih.